Qazaqstandyq mánerlep syrǵanaýshylar Golden Spin of Zagreb týrnırinde baq synaıdy
ASTANA. QazAqparat - 4-9 jeltoqsan aralyǵynda Horvatııa astanasy Zagrebte mánerlep syrǵanaýdan Golden Spin of Zagreb halyqaralyq týrnıri ótedi, dep habarlaıdy QazAqparat tilshisi.
QR Ulttyq olımpıada komıtetiniń baspasóz qyzmeti málim etkendeı, atalǵan synǵa Quralaı Ýzýrova baptaıtyn qazaqstandyq mánerlep syrǵanaý sheberleri de qatysady.
Atap aıtsaq, Qazaqstannan shyqqan tuńǵysh sporttyq jup Jansaıa Adyhanova men Ábish Baıqanov, Aıza Imambek, Alana Toqtarova, Rahat Bralın jáne Nıkıta Manko el namysyn qorǵaıdy.
«Tallındegi týrnırden soń dereý Zagrebke attanamyz. Sportshylarymyz jańa baǵdarlamasyn jankúıerge pash etip qana qoımaı, tóreshilerden jaqsy upaı alýǵa tyrysady. Bul sporttyq jup retinde endi ǵana tanylyp jatqan Jansaıa men Ábishtiń sheberligin shyńdaýǵa da taptyrmas múmkindik», - deıdi bas bapker Quralaı Ýzýrova.
Aıta keteıik, Zagrebtegi halyqaralyq týrnır 2001 jyldan beri Olımpıadaǵa upaı beretin týrnır retinde ISU baǵdarlamasyna engen. 2014 jyldan beri «Chellendjer» sanatyndaǵy jarysqa balanady.
Qazaqstandyq Denıs Ten 2009, 2014 jáne 2015 jyldary atalǵan týrnırde úsh márte jeńiske jetken bolatyn.
Esterińizde bolsa, osyǵan deıin qazaqstandyq sportshylardyń Estonııa astanasy Tallınde mánerlep syrǵanaýdan «Chellendjer» sanatyndaǵy Tallinn Trophy-2018 týrnırine qatysatyny týraly jazǵan bolatynbyz.
