Qazaqstandyq mánerlep syrǵanaýshy Denıs Ten Tokıodaǵy komandalyq álem chempıonatyna qonaq retinde qatysty. VIDEO.
ASTANA. 15 sáýir. KazAqparat - 2013 jylǵy álem chempıonatynyń kúmis júldegeri - mánerlep syrǵanaýshy Denıs Ten Tokıodaǵy kórsetilim baǵdarlamasymen komandalyq álem birinshiligine qatysty, dep habarlaıdy Vesti.kz.
Qazaqstan qurama komandasy bul týrnırge qatyspaǵandyqtan, Denıs arnaıy shaqyrylǵan qonaq retinde óner kórsetti. Mánerlep syrǵanaýshy eki nómirimen jergilikti jankúıerlerdiń qoshemetine bólendi.
Týrnır aıaqtalǵannan soń Denıs Tvıtterdegi paraqshasynda óziniń alǵan áserimen bólisti: «Komandalyq álem chempıonaty aıaqtaldy. Qyzyqty saıys boldy. Men mundaı týrnırge qatysqanyma óte qýanyshtymyn», - dep jazdy sportshy.
Álemniń alty jetekshi komandalary qatysqan chempıonattyń jeńimpazy atalmysh sporttyń tórt túri boıynsha óner kórsetý qorytyndysy boıynsha anyqtaldy. Ár oryn úshin elge upaılar jınaqtaldy. Osylaısha erler arasynda syrǵanaýdan japondyq Daısýke Takahashı jeńiske qol jetkizdi, munda ekinshi oryndy Kanadadaǵy álem chempıonatynda bizdiń Denısti jeńgen kanadalyq Patrık Chan aldy.
Áıelder arasynda eń úzdik sportshy kúnshyǵys eliniń ókili Akıko Sýdzýkı boldy. Juptasyp syrǵanaýdan reseılik Maksım Trankov jáne Tatıana Volosojar jeńimpaz boldy. Muzda bıleýden amerıkandyqtar Medıson Chok pen Evan Beıtske teń keler qarsylas bolmady.
Erler jáne áıelder arasynda eki jeńiske qol jetkizgenine qaramastan Japonııa jalpy esepte úshinshi oryndy mise tutty. Álem chempıonatynda AQSh quramasy jeńiske jetse, ekinshi oryn kanadalyqtarǵa buıyrdy.
Mánerlep syrǵanaý. Komandalyq álem chempıonaty. Tokıo, Japonııa. Qorytyndy.
1. AQSh - 57 upaı
2. Kanada - 51 upaı
3. Japonııa - 49 upaı
4. Reseı - 39 upaı
5. Qytaı - 35 upaı
6. Frantsııa - 31 upaı
