Qazaqstandyq mamandar Sardoba sý qoımasyna aýdıt júrgizý úshin Ózbekstanǵa barady
«Ózbekstan Respýblıkasyndaǵy Sardoba sý qoımasy bógetiniń buzylýyna baılanysty osy jyldyń 8 mamyrynda Qazaqstan Respýblıkasynyń Prezıdenti Q.K.Toqaev pen Ózbekstan Respýblıkasynyń Prezıdenti Sh.Mırzıeev telefon arqyly sóılesti. Áńgimelesý barysynda Memleketter basshylary transshekaralyq ózenderdiń resýrstaryn birlesip basqarý jáne paıdalaný tetikterin jetildirý týraly ýaǵdalastyqqa qol jetkizdi. Máselen, Qazaqstan Respýblıkasy jáne Ózbekstan Respýblıkasynyń Prezıdentteri qol jetkizgen ýaǵdalastyqtardy oryndaý maqsatynda Qazaqstan Respýblıkasynyń Ekologııa, geologııa jáne tabıǵı resýrstar mınıstri M.Myrzaǵalıevtiń jáne Ózbekstan Respýblıkasynyń Sý sharýashylyǵy mınıstri Sh.Hamraevtiń deńgeıinde eki kezdesý, sondaı-aq vıdeo-konferentsııa baılanys formatyndaǵy bir kezdesý ótkizildi», - dedi Úkimet basshysy.
Onyń atap ótýinshe, atalǵan kezdesýlerdiń barysynda qazaqstandyq jáne halyqaralyq sarapshylardy tarta otyryp, Sardoba sý qoımasyna tehnıkalyq aýdıt júrgizý jáne 1991 jyldan bastap salynǵan jáne qaıta jańartylǵan sý obektilerine tekserý (monıtorıng) júrgizý týraly ýaǵdalastyqtarǵa qol jetkizildi.
«Bul rette, qazaqstandyq tarap Sardoba sý qoımasyn odan ári joıý boıynsha pozıtsııany ustanatyn bolady. Sonymen qatar, sheshim tehnıkalyq aýdıt nátıjeleri boıynsha qabyldanady. Osyǵan baılanysty, taraptar Qazaqstan Respýblıkasy men Ózbekstan Respýblıkasy arasyndaǵy sý qatynastary salasyndaǵy yntymaqtastyq máseleleri jónindegi jol kartasyn ázirlep, oǵan problemalyq máselelerdi sheshýge baǵyttalǵan is-sharalardy qosa otyryp, qol qoıdy», - dedi Premer-Mınıstr.
Úkimet basshysynyń atap ótýinshe, Jol kartasyna sáıkes bıyl Qazaqstan Respýblıkasy men Ózbekstan Respýblıkasynyń aýmaǵynda 1991 jyldan keıin salynǵan sý sharýashylyǵy qurylystaryna tekserý júrgizý kózdelgen.
«Osyǵan baılanysty Qazaqstan Respýblıkasy Ekologııa, geologııa jáne tabıǵı resýrstar mınıstrligi tájirıbeli sýshylar men jobalaýshy ınjenerler qatarynan qazaqstandyq sarapshylar bóliginiń quramyn qalyptastyrdy. Qyrkúıek aıynda qazaqstandyq sarapshylardyń 1991 jyldan keıin salynǵan sý sharýashylyǵy qurylystaryna tekserý júrgizý jáne Sardoba sý qoımasyna tehnıkalyq aýdıt júrgizý úshin Ózbekstan Respýblıkasyna barýy kútilýde», - dedi Asqar Mamın.
Eske sala keteıik, 2020 jyly 2 mamyrda Ózbekstanda Sardoba sý qoımasynyń bógeti jarylyp, eldi mekender, kommýnıkatsııalyq jeli, egistikke zaqym kelgen. Sonyń saldarynan Túrkistan oblysynda 4 aýyldy sý basyp, 620 úı búlindi. Maqtaral aýdanynda 2 mamyrda túngi 00:00-de tótenshe jaǵdaı jarııalandy. Sondaı-aq, Ózbekstanda Sardoba sý qoımasyndaǵy bógettiń buzylýyna qatysty qylmystyq is qozǵaldy.
