Qazaqstandyq mamandar Ózbekstanda kóp qabatty úılerdiń beriktigin synaýda
TAShKENT. QazAqparat - Ózbekstanda iri paneldi 9 qabatty úıdiń vıbrodınamıkalyq synaýlary bastaldy. «Ózbekstandaǵy qoljetimdi turǵyn úı» baǵdarlamasy boıynsha serııalyq óndiriske engizýge josparlanatyn jańa qurylymdyq syzbanyń seısmıkalyq tózimdilikke eksperımenttik synaýlaryn Qazaq qurylys jáne sáýlet ǵylymı-zertteý jáne jobalaý ınstıtýtynyń («QazQSǴZI» AQ) mamandary júrgizip jatyr, dep habarlaıdy QR IDM baspasóz qyzmeti.
«QazQSǴZI» AQ basqarýshy dırektory Eraly Shokbarov eksperımenttik zertteýlerdi júrgizý barysynda alynǵan taldamalyq málimetter ǵylymı qyzyǵýshylyqqa ıe jáne Qazaqstannyń qurylysynda qoldanyla alady dep esepteıdi.
«Tashkenttegi vıbrodınamıkalyq synaýlar Qazaqstan men Ózbekstan arasyndaǵy halyqaralyq yntamaqtastyq úshin óte mańyzdy oqıǵa. Seısmıkalyq tózimdilikke qatysty synaýlardyń barysynda Belorýssııadan kelgen jobalaýshylar ázirlegen jańa qurylymdyq syzba tekseriletin bolady. Berilgen qurylymdyq sheshim seısmıkalyq qaýipti aımaqtarda buryn qoldanylmaǵan, sondyqtan eksperımentaldy tekseristi talap etedi. Mundaı zertteýler kótergish elementteriniń naqty sharttaryn modeldeýge jáne olardyń seısmıkalyq áser etýlerine qarsy turý qabilettiligi týraly shynshyl aqparatty alýǵa múmkindik beredi. Qazaqstan aýmaǵynyń bir bóligi seısmıkalyq belsendiligi joǵary aımaqta ornalasqandyqtan eksperımentaldy tekseris barysynda alynǵan nátıjeler bizdiń ınstıtýtymyzdyń sarapshylarymen zertteletin bolady, al keıin seısmıkaǵa tózimdi qurylysty damytý úshin tek Ózbekstandaǵy ǵana emes, sondaı-aq Qazaqstanda da paıdalanylatyn bolady», - dedi «QazQSǴZI» AQ basqarýshy dırektory Eraly Shokbarov.
Ǵımarattyń teńselýin onyń betinde ornatylǵan V-3 úlgidegi vıbromashınanyń ınertsııasy qozǵaıdy. Vıbratsııalyq mashınany qoldaný synaýlar kezinde zertteletin kótergish qabyrǵalyq qurylymdardyń júktelýiniń dınamıkalyq sıpatyn iske asyrýǵa jáne seısmıkalyq úlgidegi júktemeler kezinde olardyń áreket etýdiń negizgi erekshelikterin anyqtaýǵa múmkindik beredi.
Vıbrodınamıkalyq synaýlardy 5 kezeńnen ótkizý josparlanyp otyr. Synaýlardyń árbir kezeńinde ǵımarat birsaryndydan bastap amplıtýdalarmen belgilenetin shetke deıin teńseletin bolady.
Ár kezeńnen keıin vıbratsııalyq synaýlardy júrgizgen kezde: teńselýlerdi tirkeý jáne aldyn ala derekterdi óńdeý, qurylymdardy vızýaldy zertteý, paıda bolǵan zaqymdardy fotobelgileý, sondaı-aq ǵımarattardyń teńselýi beınege túsiriletin bolady. Vıbrosynaýlar barysynda alynǵan synaqtar men derekter keıin joıqyn jer silkinisi bolǵan jaǵdaıda ǵımarattyń jaǵdaıyn taldaýǵa qoldanylatyn bolady. Sonymen qatar, «QazQSǴZI» AQ mamandary betonnyń naqty beriktiginiń jobaǵa sáıkestigin tekseredi.
