Qazaqstandyq mamandar AQSh-taǵy «Sılıkon jazyǵynda» ınnovatsııalyq menedjment boıynsha oqıtyn bolady
ASTANA. 19 sáýir. QazAqparat - AQSh-taǵy «Sılıkon jazyǵynyń» ýnıversıtetteri qazaqstandyq mamandardy ınnovatsııalyq menedjmentke oqytýǵa daıyn.
Bul týraly búgin aımaqtyq ınnovatsııalyq júıeni qalyptastyrý ádisin talqylaýǵa arnalǵan keńeıtilgen jıynda QR Indýstrııa jáne jańa tehnologııalar vıtse-mınıstri Qanysh Tóleýshın málimdedi.
«Biz jýyrda ǵana «Kremnıı jazyǵyna» baryp qaıttyq. Onda Berklıdegi Kalıfornııa ýnıversıtetimen jáne Stenford ýnıversıtetimen bizdiń mamandardy ınnovatsııalyq menedjment jáne basqa da baǵyttar boıynsha oqytýǵa kelistik. Endi sol jerlerge ortalyqtandyrylǵan toptardy jiberip otyratyn bolamyz. Sondyqtan ákimdikterden, áleýmettik-kásipkerlik korporatsııalardan, joǵary oqý oryndarynan, sondaı-aq aımaqtardaǵy kompanııalardan bizge qyzmetkerlerdiń naqty tizimderin jiberýdi suraımyz», - dedi Q. Tóleýshın.
Onyń aıtýynsha, qazaqstandyq mamandar «Bolashaq» baǵdarlamasy aıasynda úsh nemese alty aılyq tájirıbeden ótý múmkindigine ıe bola alady. Baǵdarlamaǵa sonymen qatar aǵylshyn tiliniń kýrstary enedi.
Aıta keteıik, «Sılıkon jazyǵy» nemese keıde «Kremnıı jazyǵy» dep atalatyn aýmaq AQSh-tyń Kalıfornııa shtatyndaǵy San-Frantsısko túbeginde ornalasqan. Onda joǵary tehnologııalyq tehnıkalardy, baǵdarlamalyq qamtamasyz etý qurylǵylaryn, bıotehnologııany shyǵaratyn kompanııalar kóptep shoǵyrlanǵan.
