Qazaqstandyq loýkoster bıleti nelikten arzan
ASTANA. QazAqparat - Qazaqstandyq loýkoster ózge avıakompanııalarǵa qarǵanda bılet baǵasynyń nelikten tómen ekendigin shaǵyn vıdeo materal arqyly túsindirdi, dep habarlaıdy QazAqparat tilshisi.
QR Indýstrııa jáne ınfraqurylymdyq damý mınıstrligi Azamatyq avıatsııa komıtetiniń Feısbýktegi paraqshasynda jarııalanǵan vıdeo materıalda Qazaqstannyń alǵashqy loýkosteri Fly Arystan kompanııasy bılet baǵasynyń tómen bolýyna birneshe faktor sebep ekendigin alǵa tartady.
«Únemdilik birneshe faktorǵa baılanysty. Loýkosterler janarmaıdy únemdi túrde jumsaıtyn jańa ushaqtardy paıdalanýdy artyq kóredi. Bıznes klasstyń bolmaýy otyratyn oryndyqtardyń sanyn arttyrady. Ushaqtyń bir túrin paıdalanýy, álemdik qaýipsizdik standarttaryna saı bolý úshin tehnıkalyq qyzmet kórsetýi jáne ekıpaj oqýy bir baǵdarlama boıynsha ótedi. Bıletterdi neǵurlym erte satyp alsańyz baǵasy soǵurlym arzanǵa túsetin bolady», - dep atap ótedi kompanııa.
Sonymen qatar, jolaýshynyń tańdaýyna qaraı qosymsha qyzmetter aqyly. Tamaqtaný, jol júgi, borttaǵa unatatyn oryn, ushaqqa birinshi bolyp kirý úshin onlaın túrde aqsha tóleýge týra keledi.
Buǵan deıin burynǵy Indýstrııa jáne ınfraqurylymdyq damý mınıstri Jeńis Qasymbek loýkoster bılet quny Qazaqstanda Air Astana baǵasynan eki esege arzan bolatyndyǵyn aıtqan bolatyn.
«Máselen, túrli baǵytqa Air Astana bıletteri shamamen 100 dollardy quraıdy. Bul baǵa satyp alý merzimine baılanysty ózgerip otyrady: bir apta turyn alsańyz - bir baǵa, úsh kún buryn alsańyz - basqa baǵa degendeı. Fly Arystan bıletteri Qazaqstan baǵyttary boıynsha shamamen 40-45 dollar bolady dep boljap otyrmyz. Demek, Qazaqstandaǵy Air Astana, BekAir, Scat kompanııalarynan anaǵurlym tómen», - degen edi ol.
