Qazaqstandyq legıoner-tennısshi «Qurmet» ordenimen marapattaldy
ASTANA. QazAqparat - Tanymal qazaqstandyq tennısshi Mıhaıl Kýkýshkın «Qurmet» ordenimen marapattaldy, dep habarlaıdy QazAqparat tilshisi.
Bul týraly ol óziniń «Instagramdaǵy» paraqshasyna jazdy.
«Memlekettik nagrada, «Qurmet» ordenin alǵanyma maqtanamyn. Bul men úshin úlken qurmet. QR Prezıdenti Nursultan Nazarbaevqa senim bildirgeni úshin alǵys aıtamyn. Sondaı-aq, Qazaqstan tennıs federatsııasynyń prezıdenti Ótemuratovqa qoldaýy úshin rahmet», - dep jazdy Kýkýshkın.
Aıta keteıik, Reseıde dúnıege kelgen Mıhaıl Kýkýshkın 2008 jyldan beri elimizdiń namysyn qorǵap keledi. Osydan birer kún buryn kásipqoı tennısshiler qaýymdastyǵy (ATR) óz sportshylarynyń jańartylǵan reıtıngin jarııalǵan bolatyn. Onda otandasymyz 78-orynnan kóringen edi. Jalpy onyń reıtıngtegi eń úzdik nátıjesi - 46-oryn (2015 jyly). ATR týrnıriniń jáne Azııa oıyndarynyń jeńimpazy bolǵan.
