Qazaqstandyq qyzdar Taıbeıde ótip jatqan bokstan álem chempıonatynda 12 medaldi jeńip aldy
ASTANA. QazAqparat - Taıbeıde ótip jatqan chempıonattyń besinshi kúniniń qorytyndysy boıynsha 12 medal jeńip alǵan Qazaqstan jalpy esepte ekinshi orynda tur. Jartylaı fınalǵa 7 jasóspirim men jastar komandasynan 5 sportshy qyz shyqty.
Bul týraly Qazaqstan boks federatsııasynyń baspasóz qyzmetinen habarlady.
15 medaldi jeńip alǵan Reseı ǵana Qazaqstannan ozyp keledi, bizden keıingi orynda 8 júlde alǵan AQSh, árqaısysynyń 6 júldesi bar Qytaı, Úndistan, Túrkııa, Ýkraına elderi, 4 medaldi enshilegen Qytaılyq Taıbeı men Irlandııa bar. Italııa, Mońǵolııa, Polsha - 3 medal jeńip alsa, KHDR, Vengrııa, Taıland - 2 júlde, Ázerbaıjan, Domınıkan, Ulybrıtanııa, Frantsııa, Germanııa, Grekııa, Ońtústik Koreıa, Kosovo, Shvetsııa jáne Vetnamnyń qanjyǵasynda bir-bir medaldan bar.
Chempıonattan habar taratatyn sport tilshileri 2015 jyly Qazaqstannyń jasóspirimder arasyndaǵy chempıony atanǵan Jazıra Oraqbaevanyń (46 keli) Bolgarııanyń úsh dúrkin chempıony, 2014 jyly Eýropa qurlyǵy chempıonatynyń júldegeri Emı-Marı Todorovany 2:1 esebimen tize búktirgen jekpe-jegin 5-shi kúnniń tosynsyıy dep atady.
