Qazaqstandyq «Qyz ben teńiz» áleýmettik dramasy prokatqa shyqty
ALMATY. QazAqparat – Búgin «Qyz ben teńiz» fılmi qazaqstandyq prokatqa shyǵady. Fılmdi Nur-Sultan, Shymkent, Aqtóbe jáne Almaty qalalarynyń turǵyndary kóre alady, dep habarlaıdy QazAqparat tilshisi «Qazaqfılmge» silteme jasap.
Fılmde balalardyń tserebraldyq paralıchimen syrqat Ásel esimdi boıjetkenniń qıyn taǵdyry, onyń armandary, mahabbat jáne otbasy týraly baıandalady. Fılm «ARDI» ońaltý ortalyǵynyń qamqorlyǵyndaǵy (múgedek balalardyń ata-analarynyń qaýymdastyǵy) Dınara Sharıpovanyń ómirinen alynǵan naqty oqıǵaǵa negizdelgen.
«Múmkindigi shekteýli jandardyń jaǵdaıyn bárimiz de jaqsy bilemiz, sondyqtan biz «Qyz ben teńiz» fılmi áleýmettiń múgedekterdiń máselelerine muqııat bolýǵa kómektesedi dep senemiz. Men bul fılmdi barlyǵyna kórýge keńes beremin», - dedi «Qazaqfılm» kınostýdııasynyń prezıdenti Arman Ásenov.
«Qyz ben teńiz» kartınasy 2017 jyldyń kókteminde óndiriske engizildi. Fılmniń negizgi túsirilimi Almaty qalasynda ótti, jeke kórinister Qapshaǵaı jaǵalaýynda túsirildi.
Fılmdegi rólderdiń kópshiligin erekshe qajettilikteri bar kásibı emes akterlar – «ARDI» ońaltý ortalyǵynyń stýdentteri oınady. Mysaly, basty rólderdiń birin dılogııanyń birinshi bóligindegi rólimen tanymal Tahır Ýmarov, sondaı-aq Emır Baıgazınniń «Jaralanǵan perishte» trılogııasynyń ekinshi bóliminde Kamo rólin oınaǵan Qanaǵat Tasqaraev somdady. Al basty keıipkerdiń sińlisi róline kásibı teatr jáne kıno aktrısasy Gúlbahram Baıbosynova shaqyryldy.
«Qyz ben teńiz» fılmi keń aýdıtorııaǵa erekshe qajettilikteri bar adamdarda kezdesetin máselelerdiń barlyǵyn ashady. Kórermender bizdiń keıipkerlerimizdi jaqsy túsinip, súıip qana qoımaı, sonymen birge óz kúshteri men sheksiz múmkindikterine sene alady», - deıdi fılmniń rejısseri Muhamed Mamyrbekov.
Aıta ketý kerek, «Qyz ben teńiz» fılminiń premeralary byltyr Nur-Sultan men Almatyda anshlagpen ótken bolatyn.
