Qazaqstandyq qysqa metrajdy fılm Qyrǵyzstanda júldege ıe boldy
ASTANA. QazAqparat - Búgin TMD, Baltyq jáne Grýzııa elderiniń halyqaralyq kınofestıvali jeńimpazdarynyń esimderi belgili boldy. Olardyń ishinde Berik Jahanovtyń «Erkek» fılmi de bar, dep habarlady festıvaldiń uıymdastyrý komıtetinde.
Baıqaýda «Úzdik fılm» júldesin Pavel Kýzýıoktyń (Moldova) «Raısa» kartınasy, «Úzdik rejıssýra» Berik Jahanovtyń (Qazaqstan) - «Erkek» fılmi aldy. Ulttyq baıqaýda «Úzdik fılm» rejısser Bolsýnbek Taalaıbek ýýlýnyń «Oljo» kartınasyna buıyrsa, «Úzdik rejıssýra» nomınatsııasy rejısser Kenjebek Shaıloobaevtyń «Tegırmen» (Melnıtsa) fılmine berildi.
Ádilqazylardyń arnaıy júldesi rejısser Syrǵa Qýbandyq qyzynyń «Soblazn bogatstva» fılmine berildi. Ádilqazylar quramynda Dárijan Ómirbaev, Vırdjılı Merdjınıan, Ella Manjeeva, Taalaıbek Kýlmendeev pen Mansýr Vasatı boldy.
