Qazaqstandyq qylqalam sheberiniń jumysy 1500 sýretshiniń qatysýymen ótken halyqaralyq konkýrsta úzdik dep tanyldy
ASTANA. QazAqparat - Jyl saıyn Amerıka Qurama Shtattarynyń Nıý-Iork qalasynda sýret óneriniń «Realızm», «Sıýrrealızm», «Impressıonızm», «Peızaj», «Fantastıka», t.b. janrlary boıynsha báıge jarııalanyp, marapat ıeleri aıqyndalatyny belgili. Buǵan deıin osynaý jarystarǵa qazaqtyń daryndy sýretshileri - Baqytnur Búrdesbekov, Talǵat Tileýjanov, Anar Ábjanova, Beıbit Ásemquldar qatysyp, elimizdiń atyn shyǵarǵan bolatyn.
2014 jylǵy qylqalam sheberleriniń kórmesine AQSh, Kanada, Argentına, Kolýmbııa, Ekvador, Ulybrıtanııa, Frantsııa, Germanııa, Reseı, Qytaı, Makao, Japonııa, Ońtústik Koreıa, Qazaqstan, Qyrǵyzstan, Ózbekstan, Izraıl, Chehoslovakııa sııaqty elderden 1500 sýretshiniń eńbegi qoıylǵan. Álemniń túkpir-túkpirinen jınalǵan 28 sýretshi túrli stıl boıynsha altyn, kúmis, qola medaldarǵa ıe boldy. Sol konkýrsta CITYSCAPE («Qala peızajy») aatalymynda «Altyn qyran» medali jerlesimiz Jeńis Kákenulyna buıyrdy.
Jeńis Kákenulynyń aıtýyna qaraǵanda, saıysty uıymdastyrýshylar qala peızajdaryn beınelegen sýretshilerdi iriktegen kezde onyń jeke veb saıtyndaǵy Astana qalasynyń kórinisterin, ıaǵnı Esil ózeniniń sol jaǵalaýyndaǵy ǵımarattardyń kúzgi kelbetin tańdap alypty.
Sondaı-aq osy saıystyń keı jeńimpazdary sáýir aıynda Nıý-Iorkte ótetin ArtEHPO kórmesine qatysý múmkindigine ıe bola alady. Jerlesimiz qazirde osy kórmege qyzý daıyndyq ústinde. Jeńis Kákenulynyń bul saıysta da qanjyǵasyn maılap qaıtýyna tilektespiz.
Aıta keteıik, Qazaqstan Sýretshiler odaǵynyń múshesi, QR Mádenıet qaıratkeri, Prezıdenttik stıpendııa ıegeri Jeńis Kákenuly 1965 jyly Almaty oblysynda dúnıege kelgen.
1988 jyldan beri elimizdegi kórmelerge, sondaı-aq AQSh, Germanııa, Túrkııa elderinde kórmelerge qatysqan. 2000 jylǵy «Mádenıetti qoldaý jyly» belgisiniń avtory. Qazaqtyń beıneleý álemi, qazaq sýretshileriniń shyǵarmashylyq bolmysy týraly pýblıtsıstıkalyq eńbekteri engen «Aq zer» atty jınaqtyń avtory. 200-ge jýyq kitaptyń muqabasyn bezendirip, jaryqqa shyǵarǵan.
Almaty, Astana qalalarynda jeke kórmeler uıymdastyryp turady. Kartınalary Memlekettik Á.Qasteev atyndaǵy óner mýzeıinde, Qazirgi zaman óneri mýzeıinde, Prezıdenttik mádenıet ortalyǵynda saqtaýly. Elimizdiń jáne shetelderdiń (Moldova, Germanııa, Túrkııa) jeke kartına jınaýshylar qorynda da sýretteri bar.
Sondaı-aq 2009 jyly Túrkııada ótken sýretshilerdiń halyqaralyq kórmesinde Túrkııa Prezıdenti Abdolla Gúl myrzaǵa TÚRKІSOI-dyń atynan sýretshi Jeńis Kákenulynyń «Amasııa» atty kartınasy syıǵa tartylǵan bolatyn. Gúlden OSPANOVA
