Qazaqstandyq qutqarýshylar Japonııa men Polsha alpınısterin qutqardy
ASTANA. QazAqparat - Qazaqstandyq qutqarýshylar Qyrǵyzstanda apatqa ushyraǵan tikushaq jolaýshylaryn qutqardy, dep habarlaıdy QazAqparat tilshisi QR ІІM Tótenshe jaǵdaılar komıtetine silteme jasap.
Eske sala ketsek, Qyrǵyzstannyń Tótenshe jaǵdaılar mınıstrligi qazaqstandyq áriptesterinen Ystyqkól oblysynda tikushaqtyń apatqa ushyraýynan zardap shekkenderdi evakýatsııalaý úshin kómek suraǵan edi.
«Qyrǵyzstan taýlarynda Qyrǵyzstan Qorǵanys mınıstrliginiń MI-8 tikushaǵy apatqa ushyrady. Tikushaqta 9 alpınıst (Japonııa, Polsha azamattary), úsh ekıpaj múshesi jáne bir nusqaýshy bolǵan. Olardy evakýatsııalaý úshin qyrǵyzstandyq tarap bizden áýe kemesin jiberýdi surady. Premer-mınıstrmen kelise otyryp, apat ornyna «Qazáýequtqarý» AQ Mı-171 tikushaǵyn jiberdik. 15:25-te qazaqstandyq qutqarýshylar muzdyqtan túsirildi jáne jaqyn ornalasqan Qyrǵyzstan Respýblıkasynyń eldimekenine jetkizildi», - dep jaýap berdi QR ІІM Tótenshe jaǵdaılar komıtetiniń tóraǵasy Vladımır Bekker baspasóz máslıhatynda jýrnalıster suraǵyna.
Komıtet tóraǵasynyń aıtýynsha, Qyrǵyzstanǵa 4 qazaqstandyq qutqarýshy jiberilgen. Ázirge zardap shekkender týraly aqparat joq. Tikushaq apatynyń sebepterin qyrǵyzstandyq tarap anyqtaıdy.
