Qazaqstandyq qutqarýshylar Túrkııada úıindilerdiń astynan 80 adamnyń denesin shyǵardy
Bul málimetterdi búgin QR Tótenshe jaǵdaılar mınıstrliginiń baspasóz qyzmeti jarııalady, dep habarlaıdy QazAqparat.
Qazirgi ýaqytta qazaqstandyq qutqarýshylar izdeý-qutqarý jumystaryn jalǵastyrýda.
Gazıantep qalasynda birinshi eshelonmen barǵan qutqarýshylar táýlik boıy eki aýysymda eki ýchaskede jumys istep jatyr.
Qutqarýshylardyń bir toby toǵyz qabatty ǵımaratta júr. Ǵımarat tolyǵymen qıraǵan, úıindilerdiń astynan 4 adam qutqaryldy, 22 adamnyń denesi shyǵaryldy.
Qutqarýshylardyń basqa toby alty qabatty ǵımaratta jumys júrgizýde. Ǵımarat tolyǵymen qıraǵan. Úıindilerdiń arasynan 24 adamnyń denesi shyǵaryldy.
Qazaqstann TJM ekinshi eshelonmen barǵan qutqarýshylar Túrkııaǵa kelgen sátten bastap Nýrdagy qalasynda izdeý-qutqarý jumystaryn táýlik boıy júrgizýde. Tolyǵymen qıraǵan ǵımaratta qazaqstandyq qutqarýshylar adamdardyń ornalasqan jeri men jaı-kúıin anyqtaý, úıindiler astynda zardap shekkendermen aýdıo baılanys ornatý, qajetti kómektiń kólemi men sıpatyn anyqtaý boıynsha jumys júrgizdi.
Qazaqstandyq qutqarýshylar kólemi 18 myń tekshe metrden asatyn úıindiniń astynan úsh tiri adamdy - er adam men eki áıeldi shyǵardy. Adamdar dereý medıtsına qyzmetkerlerine jetkizildi. 11 adamnyń denesi shyǵaryldy. Zardap shekken adamdardy izdeýge tehnıkalyq quraldar, úıindilerdi bólshekteýgearnalǵan ınjenerlik tehnıka paıdalanylýda. Úıindilerdiń arasynan adamdardy izdeý jumystary júrgizilip jatyr.
Qazaqstan TJM Apattar medıtsınasy ortalyǵynyń dárigerleri zardap shekken adamdarǵa táýlik boıy alǵashqy medıtsınalyq kómek kórsetýde. Kúnine orta eseppen 35-ten astam zardap shekken adam medıtsınalyq kómekke júginedi. Olardyń ishinde stresstiń jedel reaktsııasymen, tynys alý joldarynyń aýrýlarymen, sondaı-aq ártúrli jaraqattarmen baılanysty aýrýlar basym.
