Qazaqstandyq qutqarýshylar tótenshe jaǵdaı kezinde qalaı jumys istep jatyr
NUR-SULTAN. QazAqparat - QR ІІM Tótenshe jaǵdaılar komıteti tótenshe jaǵdaı jáne karantın kezeńinde atqaryp jatqan jumysy jaıynda aıtyp berdi, dep habarlaıdy QazAqparat tilshisi.
«Tótenshe jaǵdaı jáne karantın kezeńinde eldiń búkil óńirinde qulaqtandyrý júıesi iske qosylyp, kún saıyn jergilikti jáne respýblıkalyq telearnalardy tosqaýyldaý arqyly halyqqa SMS-habarlandyrý júrgizilýde. El turǵyndaryn tótenshe jaǵdaı engizilgendigi jáne karantın jarııalanǵandyǵy týraly habarlandyrý úshin respýblıkalyq jáne oblystyq teleradıoarnalarda 1717 ret tosqaýyldaý uıymdastyryldy. «Darmen» qosymshasy jáne «112» biryńǵaı nómiri arqyly qalaǵa kirý jáne shyǵý jabylǵandyǵy, karantın jarııalanǵandyǵy, qaýyrt jeli jáne Egov memlekettik qyzmetter boıynsha telefon nómirleri týraly 288 SMS-habarlama jiberildi»,- dep atap ótedi komıtetten.
Vedomstvo málimetinshe, órt sóndirý qyzmeti tehnıkalarynyń kómegimen Aqtóbe, Qaraǵandy, Túrkistan jáne Nur-Sultan qalalarynda kóshelerdi zalalsyzdandyrý jumystary júrgizildi. Bul jumystarǵa jeke quramnyń 240 mamany men 70 tehnıkasy jumyldyryldy. Olar osy ýaqytqa deıin shamamen 8 mln sharshy metr aýmaqty zalasyzdandyryp shyqty. TJK Kókshetaý tehnıkalyq ınstıtýtynyń 20 qyzmetkeri de qala kóshelerin jáne adamdar kóp jınalatyn nysandar alańyn zalalsyzdandyrý jumystaryna kómektesip júr.
QR ІІM TJK Respýblıkalyq jedel qutqarý otrıadynyń qutqarýshylary Almaty qalasy Naýryzbaı aýdandyq ákimdiginiń jáne «Nur Otan» partııasynyń aýdandyq fılıalynyń qoldaýymen «Biz birgemiz!» respýblıkalyq aktsııasyna qatysyp, muqtaj adamdarǵa 100 myńnan astam maska taratty.
