Qazaqstandyq qutqarýshylar qyrǵyz tikushaǵy apatqa ushyraǵan jerge eki reıs jasady
BІShKEK. QazAqparat - Ystyqkól oblysynyń Ońtústik Eńilshek alańyndaǵy tikushaq apaty tirkelgen orynnan alty adam (tórteýi zardap shekken) Bishkekke jetkizildi, dep habarlaıdy «QazAqparat» HAA menshikti tilshisi Qyrǵyz Respýblıkasy Qarýly Kúshteriniń áýe qorǵanys kúshteriniń baspasóz qyzmetine silteme jasap.
Zardap shekkenderdiń báriniń jaǵdaıy turaqty. Jetkizilgennen keıin olar Qyrǵyzstan astanasynyń medıtsınalyq mekemelerine ornalastyrylyp, qajetti em-dom alǵan. Olardyń bári de Bishkekke Qyrǵyz Respýblıkasy áýe qorǵanysy kúshteriniń MI-8 tikushaǵymen jetkizilgen.
Sonymen birge, Qazaqstan Respýblıkasy Іshki ister mınıstrligi Tótenshe jaǵdaılar boıynsha komıtettiń tikushaǵy qyrǵyz tikushaǵy apat bolǵan jerge eki márte reıs jasaǵan.
«QazAqparat» HAA tilshisine Qyrǵyz Respýblıkasy TJM daǵdarys jaǵdaılaryn basqarý ortalyǵynyń basshysy Muhamed Svarov habarlaǵandaı, birinshi reıste qazaqstandyq qutqarýshylar Han táńiri shyńynyń aýmaǵyndaǵy Ońtústik Enilshek alańynan Shaar-Qudyq - «Qarqara» bazalyq lagerine tikushaqtyń 8 jolaýshysyn jetkizgen. Apattan zardap shekkender budan soń Bishkekke avtokólikpen jetkiziledi. Ekinshi reıste bizdiń tikushaq budan buryn qyrǵyz tikushaǵy aparyp tastaǵan apatty tergeý boıynsha komıssııa múshelerin alyp ketý úshin jolǵa shyqqan.
Eske sala ketsek, búgin Ońtústik Enilshek alańynda qutqarý operatsııasyn júrgizý kezinde Qyrǵyzstan Respýblıkasy Qarýly kúshteriniń Mı-8 MTV tikushaǵy apatqa ushyraǵan bolatyn. Tikushaq jerge qoný kezinde qatty jeldiń saldarynan sol jaq qyryna aýdarylyp ketken.
Osydan keıin Qyrǵyzstannyń Tótenshe jaǵdaılar mınıstrligi qazaqstandyq áriptesterinen Ystyqkól oblysynda tikushaqtyń apatqa ushyraýynan zardap shekkenderdi evakýatsııalaý úshin kómek surady. Qazaqstan tarapy suranysty qabyldap, kórshi respýblıkanyń ІІM tikushaq jiberdi.
