Qazaqstandyq qusbegiler Azııa birinshiliginde top jardy
ASTANA. QazAqparat - Qansonardyń qadirin biletin qazaqqa qusbegi sózi de tańsyq emes. Sol qyran qustardy baptaıtyn kil myqtylar Almatyda bas qosty.
Osymen ekinshi ret uıymdastyrylyp otyrǵan Azııa birinshiligine elimizdiń birneshe oblysynan 70-ke jýyq jáne álemniń ár buryshynan 20-dan asa qusbegi kelipti. Bul jarystyń negizgi maqsaty - ata kásibimizdi halyqaralyq deńgeıge shyǵaryp, ony sport retinde damytý.
«Eń mańyzdy dúnıeniń biri - bul bizdiń ónerimizdiń nasıhaty. Jáne Qazaqstannyń ózindik bir ereksheligi bar, bul qusbegilikti sport retinde de damytyp otyr. Jáne qusbegilik jarysynyń jeńimpazdaryna Azııa chempıony jáne halyqaralyq dárejedegi sport sheberi ataǵy beriledi», - deıdi Ulttyq sport qaýymdastyǵynyń atqarýshy dırektory Rahat Jaqsybaı.
Jarys negizinen úsh sanatta ótti. ıAǵnı, Búrkit pen Qarshyǵa jáne Itelgi baptaǵan qusbegiler arasynan úzdikter anyqtaldy. «Qyran qustardyń ishindegi eń alyby búrkit desek, ony baptaý da ońaı emes», - deıdi Mońǵolııadan kelgen qandasymyz Saılaýhan Zákárııauly.
«Búrkitti eń aldymen qolǵa et ustap, shaqyrýǵa salamyz. Odan keıin shyrǵa degen bar. Túlki, qoıan bolsa sony súırep shyrǵaǵa salamyz. Odan keıin ańǵa salamyz. Sóıtip baptaımyz. Búrkittiń baby óte qıyn. At sııaqty jaratamyz. Baby kelgende, ol qandaı ańdy bolsyn alady», - deıdi Saılaýhan Zákárııauly.
Azııa chempıonatynyń qorytyndysy boıynsha qarshyǵada qazaqtardyń aldyna eshkim túse almady. Babajan Berikbolsyn bas báıgeni ıelense, Mamutqan Zakıge kúmis medal buıyrdy. Seıitjan Beksultan qola júldeger atandy.
