Qazaqstandyq kýrsanttar áskerı drondardy anyqtaıtyn qurylǵy oılap tapty

ASTANA. QazAqparat – Qazaqstandyq kýrsanttar áskerı drondardy anyqtaıtyn qurylǵy oılap tapty. Qorǵanys mınıstrliginiń «Online-brıfıng» aptalyq baǵdarlamasyna suhbat bergen Radıoelektronıka jáne baılanys áskerı-ınjenerlik ınstıtýty bastyǵynyń birinshi orynbasary Murat Oljabaev osy qurylǵylardy tanystyrdy, dep habarlaıdy QazAqparat tilshisi.

«Oqý ornynda áskerı baǵyttaǵy ǵylymı-zertteý jumystaryna kóp kóńil bólinedi. Mine, sonyń biri – ushqyshsyz ushatyn apparattardy joıý úshin qoldanylatyn qural. Bul – kommertsııalyq dıapazondaǵy ushqyshtyń kómeginsiz ushatyn apparattardy qondyryp, onyń basqarý pýnktin, operatoryn anyqtaýǵa múmkindik beretin qural. Ony ózimizdiń kýrsanttar oılap shyǵaryp, kóptegen oqý-jattyǵýlar barysynda qoldanyp, oń baǵa aldy. Buǵan «Naızaǵaı» degen ataý berildi», - dep kýrsanttardyń jetistikterimen bólisti Murat Oljabaev.

Munymen qosa, áskerı oqý ornyndaǵy ónertapqyshtar gologrammalyq qurylǵy oılap tapqan. Ol dáris barysynda ótetin qarý túrlerin 3D ólshemde kórsetedi, ıaǵnı qurylǵynyń kómegimen qarýdyń jumys prıtsıpin, qurylymyn, sondaı-aq oqtyń nemese zymyrannyń traektorııasyn baqylaýǵa bolady.