Qazaqstandyq «Qojaıyndar» fılmi «Azııalyq Oskar» atalymyna usynyldy
ASTANA. QazAqparat - Ádilhan Erjanovtyń «Qojaıyndar» fılmi «Azııalyq Oskardyń» úzdik fılm jáne úzdik operatorlyq jumys atalymdaryna usynyldy. Bul týraly Feısbýktegi paraqshasynda belgili qazaqstandyq kınotanýshy Gúlnar Ábikeeva jazdy.
Onyń sózine qaraǵanda, «Jyldyń úzdik fılmi» atalymynda «Qojaıyndar» fılminen basqa 4 kartına úmitti. Olar Nýrı Bılge Djeılannyń «Qysqy uıqy» (Kannda «Altyn palma japyraǵy»), Andreı Zvıagıntsevtiń «Levıafan» (Kannda úzdik stsenarıı úshin syılyq), Reza Dormıshıannyń ırandyq «Men ókpelesmeımin!» (Berlınalege qatysýshy) kartınasy jáne Shavkat Amın Korkanyń qurdtyq «Tastaǵy estelik» lentasy.
«Bıyl Berlınalede bas júldeni alǵan qytaılyq «Qara kómir, juqa muz» lentasy da bul sanatta usynylmaǵan. Tek «Úzdik operatorlyq jumysqa» usynypty. Bul atalymǵa qazaqstandyq jas operator Erkinbek Pitirálıev usynyldy. Onyń básekelesi eki qytaılyq jáne eki reseılik operator bolmaq», - dedi ol.
Azııalyq Oskardy tabys etý saltanaty APSA saıtynda ( https://www.asiapacificscreenacademy.com/ ) 2014 jyldyń 11 jeltoqsanynda onlaında kórsetiledi.
Azııalyq kınosyılyq (angl. Asian Film Awards) - halyqaralyq prokattaǵy úzdik azııalyq kartınalar úshin beriledi. Alǵash ret ol 2007 jyly 20 naýryzda Gonkongte ótken. Keıbir BAQ ony birden «Azııalyq Oskar» dep atap ketken.
