Qazaqstandyq qoı eti Bahreınge eksporttalady
ASTANA. QazAqparat - «QazAgro» Ulttyq holdıngi qazaqstandyq mal sharýashylyǵy úshin eksporttyń jańa baǵytyna jol ashty. Osy jyly Almaty jáne Jambyl oblystary qoı sharýashylyqtary qoı etteriniń alǵashqy partııalary Bahreın Ámirligine jiberilýi josparlanýda. Etti Iran men Qytaıǵa eksporttaýdyń suraqtary jalǵasýda, dep habarlady holdıngtiń baspasóz qyzmetinen.
Taıaý Shyǵys memleketiniń ókilderi «QazAgro» holdınginiń quramyndaǵy - «QazAgroÓnim» AQ enshiles kompanııasy jáne onyń seriktes-eksporter kompanııasy «Empire Group Corporation» JShS-nyń shaqyrýymen Qazaqstanǵa keldi. Sapardyń maqsaty - respýblıkanyń veterınarlyq jaǵdaıyn zertteý jáne Qazaqstannyń qoı sharýashylyqtary men et qaıta óńdeý kásiporyndarynyń «Halal» standarttaryna sáıkestigin saraptaý. Bahreın Ámirlikteri azyq-túlik jáne agrarlyq sala Komıtetiniń tóraǵasy Haled Álı Rashıd Alamın bastap kelgen delegatsııaǵa memlekettik veterınarlyq qyzmettiń, karantındyq qaýipsizdik, logıstıka jáne bıznes qyzmetteriniń ókilderi de kirdi.
Іssapar barysynda Bahreın mamandary Almaty jáne Jambyl oblystaryndaǵy birqatar mal sharýashylyqtary men et kombınattaryn aralap, onda qoılardy baǵý jaǵdaıymen, veterınarlyq qaýipsizdik, ınfraqurylym jaǵdaıymen, maldy soıý jáne etin saqtaý erejelerimen tanysty.
Bahreın mamandary Almaty oblysy Jambyl aýdanyndaǵy («Murynbaı» ShQ, «Tulpar» ShQ, «Eginshi-nur» ShQ) jáne Jambyl oblysy Merki aýdanyndaǵy ( «Plemzavod «Merki» AQ) sharýashylyqtardyń jaıylym jerleri men maldyń jaǵdaıyn qarap ótti. Sonymen qatar delegatsııa músheleri «Meat & Product Service» JShS jáne «Merki-et» JShS et kombınattarynyń soıý oryndarynyń jumysy men jaǵdaıymen tanysty. Mamandar qaralǵan mal bastarynyń jaǵdaıyn joǵary baǵalady. Bahreın qonaqtary maldy baǵý men azyqtandyrý jaǵdaıynyń ekologııalyq minsizdigin erekshe atap ótti. Sonymen qatar qazaqstandyq qoı etiniń dámdik qasıetterine eń joǵary baǵa berildi. Degenmen, maldy soıýmen baılanysty erejeler men sharttar boıynsha eskertýler boldy, biraq qazaqstandyq tarap jaqyn arada talaptarǵa sáıkestendiretinine mindettendi.
Delegatsııa músheleriniń sózine sáıkes qazaqstandyq qoı etin Bahreınge jetkizý boıynsha barlyq qajetti sharalar ótkizilgennen keıin alǵashqy ýaqytta jetkizilim tiri salmaqta júzege asyrylady. Keıin tońazytylǵan túrinde jetikiziledi.
