Qazaqstandyq qos sportshy ústel tennısinen álem chempıonatyna joldama aldy
ASTANA. QazAqparat – Qazaqstandyqtar, qaraǵandylyq Záýresh Aqasheva men shymkenttik Sarvınoz Mırkadırova ústel tennısinen álem chempıonatyna joldama aldy, dep habarlaıdy QazAqparat tilshisi.
Ulttyq olımpıada komıtetinen málim etkenindeı, Z.Aqasheva men S.Mırkadırova ITTF reıtıngisi boıynsha 20-28 mamyrda Ońtústik Afrıka Respýblıkasynyń Dýrban qalasynda ótetin dúnıejúzilik dodada baq synaıtyn boldy.
Olar jekeleı esepte óner kórsetedi. Záýresh sondaı-aq juptyq jáne aralas synda sheberlik baıqasady.
Budan buryn jyldyń basty dodasyna Kırıll Gerasımenko (Astana, jekeleı jáne juptyq syn), Alan Qurmanǵalıev (Qaraǵandy, juptyq syn), Aıdos Kenjeǵulov (Almaty, aralas syn), Denıs Jolýdev, Saǵyntaı Qurmambaev (Óskemen, ekeýi de juptyq syn) jáne Anastasııa Lavrova (Astana, juptyq syn) joldama alǵan edi.
Eske sala keteıik, budan buryn qazaqstandyqtardyń ústel tennısinen Chernogorııadaǵy týrnırde óner kórsetetinin jazǵan bolatynbyz.
