Qazaqstandyq qos boksshy Reseıde jekpe-jek ótkizedi

ASTANA. QazAqparat - 14 shilde kúni Ekaterınbýrg qalasynda RCC Boxing Promotions kompanııasynyń uıymdastyrýymen boks keshi ótedi. Bul týraly VKontakte áleýmettik jelisinde "Qazaqstannyń kásipqoı boksy" akkaýntynda málim etildi, dep habarlaıdy QazAqparat. 

Sharaǵa Qazaqstannan eki sportshy qatysady. Onyń biri - birinshi jartylaı orta salmaqtaǵy Dáýlet Dáýkenov (5-0, 3KO). Boksshynyń qarsylasy ázirge belgisiz. Qazaqstannyń namysyn ekinshi bolyp asa jeńil salmaqtaǵy Madııar Januzaq (4-0, 1KO) qorǵamaq. Boksshy fılıppındik Alfoe Dagaıloanamen (9-2-5, 3KO) kúsh synasady. 

Dáýkenovtiń sońǵy jekpe-jegi 18 sáýirde Ózbekstannyń atynan bokstasqan Maksýd Djýmaevty (12-16-1, 6KO) aldyn ala jeńýimen aıaqtalǵan bolatyn. Al Madııar Januzaq sońǵy ret 28 aqpan kúni fılıppındik boksshy Djon Mark Alımaneni tóreshilerdiń biraýyzdan qabyldaǵan ortaq sheshimimen jeńip shyqqan.