Qazaqstandyq koronavırýs juqtyrdym dep dárigerlerdi teksergisi kelgen
«Sońǵy táýlikte tótenshe jaǵdaı tártibin buzǵany úshin 124 adam jaýapqa tartyldy. Zańsyz joǵary baǵada satylyp jatqan 40 myń maska men 2 myń lıtrden astam antıseptık anyqtaldy», - dedi QR Aqparat jáne qoǵamdyq damý mınıstri Dáýren Abaev.
Mınıstr bul rette tártip buzǵandar arasyndaǵy bir azamattyń áreketine toqtalyp ótti.
«Azamat DamýMed portalynda ózinde koronavırýs belgisi bar dep kórsetken. Biraq jedel járdem dárigerleri ol adamnan eshbir aýrý belgisin tappaǵan. Keıinnen anyqtalǵandaı, ol azamat júıeniń, dárigerlerdiń jumysyn teksergisi kelipti. Áıtpese, esh jeri aýyrmaǵan, shetelge shyqpaǵan, aýyrǵan adamdarmen baılanysta bolmaǵan. Dárigerlerimiz onsyz da, uıyqtamaı, úılerine qaıtpaı, bar janyn salyp jumys isteýde. Olardyń ár mınýty baǵaly. Ár sekýndy sanaýly», - deıdi ol.
