Qazaqstandyq qorǵanys-ónerkásip kesheniniń ónimderi halyqaralyq forýmda tanystyryldy
Qazaqstandyq stend 200 sharshy metrden astam aýdandy alyp otyr, onda otandyq kompanııalar áskerı jáne eki maqsattaǵy ónimderiniń 120-dan astam úlgiler men maketterin ornalastyrdy.
Aıta ketý jón, QÓK otandyq kásiporyndar bul forýmǵa úshinshi jyl qatysyp, eksporttyq potentsıaly bar qarý-jaraq pen áskerı tehnıkanyń jańa úlgilerin usynýda.
Ulttyq kórme ekspozıtsııasyna «KAE» JShS, «S.M. Kırov atyndaǵy zaýyt» AQ, «Tynys» AQ, «Semeı ınjınırıng» AQ, «Kazspetsekport» RMK, «405 avıajóndeý zaýyty» AQ jáne QÓK salasynyń basqa da kompanııalary qatysty.
«KAE» JShS-tiń Elektrondyq-optıkalyq ónimin shyǵaratyn zaýyty kórmede teplovızııalyq quraldar úshin ınfraqyzyl lınzalardy jáne radıobaılanystyń kásibı quraldaryn usyndy.
«S.M. Kırov atyndaǵy zaýyt» AQ ámbebap polıgon qural-jabdyǵyn kórsetti. Onyń quramynda maqsatty qondyrǵylar, tórli ólshemdegi maqsattar, basqarý bloktar, sondaı-aq radıoreleılik stantsııalar boldy.
«Semeı ınjınırıng» kásiporny jańǵyrtylǵan brondalǵan tank tehnıkasy men konversıondy tehnıkanyń maketterin, onyń ishinde T-72 tanki, JÁJM jáne BTR-80 negizinde jasalǵan jóndeý-evakýatsııalyq pen barlaý-baqylaý mashınalaryn usynǵan.
«Tynys» AQ «Ásker-2018» forýmynda áýe ónerkásibi úshin quramdas bólshekterin jáne áskerı amýnıtsııany: bronejılet, brondalǵan júıeler, qorǵanysh plıtalar, dýlyǵalar jáne basqa da ónimderin kórsetti.
Forým barysynda qazaqstandyq delegatsııa shetel áriptestermen birqatar kelissózder ótkizý josparlap otyr.
Aıta keteıik, «Ásker-2018» Halyqaralyq áskerı-tehnıkalyq forým dástúrli túrde Máskeý oblysynyń (RF) Alabıno polıgony jáne Kýbınka aerodromynyń «Patrıot» kongress-kórme ortalyǵynyń aýmaǵynda 2018 jyldyń 21-26 tamyz aralyǵynda ótýde. Forým uıymdastyrýshysy - RF Qorǵanys mınıstrligi. «Ásker-2018» forým sheńberinde áskerı tehnıkanyń aýada, jerde jáne sýdaǵy múmkindikteri kórsetiledi, sondaı-aq keń aýqymdy ǵylymı-iskerlik baǵdarlama ótkiziledi.
