Qazaqstandyq korablder teńiz bıatlonyna qatysý úshin jolǵa shyqty - QR QM (FOTO)
«Oral» jáne «Saryarqa» eki zymyran-artıllerııalyq korabli «Kaspıı teńizi - 2015» birinshi halyqaralyq baıqaýǵa qatysý úshin tikeleı Kaspııdiń reseı sý aıdyndaryna júzetin bolady. Jolǵa shyqqan jaýyngerlik korablderdiń ekıpajdary, 24 shildede Mahachkala qalasynyń portynda Kaspııdiń reseı jaǵalaýlarynda bolady. «Biz baıqaýǵa uzaq daıyndaldyq. Biz úshin ol tyń dúnıe, is júzinde múmkindikterimizdi synap, qosymsha praktıkalyq tájirıbe jınaqtaımyz» - deıdi «Saryarqa» korabliniń komandıri kapıtan-leıtenant Rýstam Júnisov.
«Kaspıı teńizi - 2015» halyqaralyq baıqaýy kaspıı mańy elderi áskerı-teńiz kúshteriniń alǵashqy saıysy. Ol 1 tamyzda bastaý alyp, 15 tamyzda aıaqtalady. Teńiz bıatlonynda elimizdi «Oral» jáne «Saryrqa» otandyq zymyran-artıllerııalyq korablderiniń ekıpajdary, sondaı-aq teńiz jaıaý áskeriniń brıgadasy usynatyn bolady. Teńiz bıatlony úsh kezeńnen turady. Birinshisi - «Kaspıılik qunan jarysy». Munda teńiz jaıaý áskeri bólimsheleriniń áskerı qyzmetshilerine berilgen baǵdardy barynsha jyldam ótý, teńizde jáne jaǵalaýda nysanalardy sátti joıý qajet. «Kaspıı kýbogy» atty ekinshi kezeńge tórt eldiń sýústi korablderiniń ekıpajdary qatysady. Olar berilgen baǵdar boıynsha sheńberdi aınalady, shaǵyn ólshemdi teńiz jáne áýe nysanalaryn, júzbeli mınalardy joıý boıynsha jaýyngerlik jattyǵýlardy oryndaıdy. Keıinnen korabldi zákir turaǵyna kóshirýdi, zákirge qoıýdy, órnekteý jalaýlaryn qoldana otyryp, belgilerdi qabyldaý-taratýdy júzege asyrady. Sodan keıin ekıpajdarǵa korabldiń «apatqa tózý» koordınatalary beriledi. Qatysýshylarǵa oqıǵa ornyna kelý, jolaýshylardy qutqarý jáne bortqa kóterýdi júrgizý qajet etiledi. Úshinshi kezeń - «Sporttyq». Áskerı qyzmetshilerdiń dene daıarlyǵyn aıqyndaýǵa baǵyttalǵan. Teńiz jaıaý áskeri bólimsheleri men sýústi korablderi ekıpajdarynyń jeke quramyna 100 metrge erkin stılde júzý, gir sportynda saıysý, bólimshe quramynda 5 shaqyrymǵa júgirý, arqan tartý sekildi normatıvterdi tapsyrý qajet. Barlyq úsh kezeń nátıjeleri boıynsha úzdikter medaldarmen marapattalady, jeńimpazdar komandalyq synaqta birinshi oryn kýbogyn alatyn bolady.