Qazaqstandyq kontrabandashy birqazan bastaryn alyp ótpek bolǵany úshin 10 jylǵa sottalýy múmkin
ASTANA. QazAqparat - Qazaqstan azamaty Reseıge jalpy quny 6,8 mln rýblden astam somaǵa baǵalanǵan sırek kezdesetin qustyń keptirilgen 70 basyn zańsyz alyp ótpek bolǵany úshin sot aldynda jaýap beredi.
Ol 10 jylǵa bas bostandyǵynan aıyrylýy múmkin, dep habarlady TASS Batys-Sibir kólik prokýratýrasyna silteme jasap.
«Tergeý nusqasy boıynsha aıyptalýshy Qazaqstan Respýblıkasy aýmaǵynda belgisiz bireýden RF Qyzyl kitabyna engizilgen túrine jatatyn birqazan tuqymdas qustardyń keptirilgen basyn satyp alǵan», - delingen habarlamada.
Qazaqstan azamatyna qatysty RF QK 226.1-baby 1-bóligi boıynsha qylmystyq is qozǵaldy. Aıyptaý qorytyndysyn Rýbtsov kólik prokýrory bekitip, is Altaı ólkesiniń Tretıakovskıı aýdandyq sotyna jiberildi. Er adam 10 jylǵa sottalýy múmkin. Baptyń sanktsııasy 1 mıllıon rýblge deıingi mólsherdegi aıyppuldy kózdeıdi.
Eske salsaq, óz kóligimen Reseıge qustyń basyn alyp ótpek bolǵan er adamdy Reseı FQQ Altaı ólkesindegi Shekara qyzmetiniń qyzmetkerleri men Altaı keden qyzmetiniń jedel qyzmetkerleri ustady. Onyń qolynda úsh jol sómkesi bolǵan.
