Qazaqstandyq konkıshiler «Tórt qurlyq týrnırinen» jeti medal jeńip aldy
NUR-SULTAN. QazAqparat - AQSh-tyń Mılýokı qalasynda konkımen júgirý sportynan alǵash ret ótken «Tórt qurlyq týrnıri» óz máresine jetti, dep habarlaıdy QazAqparat tilshisi.
QR Ulttyq olımpıadalyq komıteti habarlaǵandaı, atalǵan týrnırden jerlesterimiz 1 altyn, 3 kúmis, 3 qola medal jeńip aldy.
Birinshi jarys kúniniń qorytyndysy boıynsha qazaqstandyq sportshylar bes medal ıelendi.
Roman Krech Qazaqstan qorjynyna alǵashqy medaldi saldy. Ol 500 metrge jarysýdan qola júldeger atanǵan. Osy qashyqtyqta synǵa túsken taǵy bir qazaqstandyq Artýr Galıev onynshy orynǵa turaqtady.
3000 metrge júgirýden áıelder arasyndaǵy básekede Nadejda Morozova kúmiske qol jetkizse, 5000 metrge jarysqan erler arasynda Vıtalıı Şıgolev altynnan alqa taqty.
Osy básekede Dmıtrıı Morozov kúmiske ıelik etken. Sprıntten komandalyq jarysta Artýr Galıev, Stanıslav Palkın jáne Aleksandr Klenko úshtigi qolaǵa qol jetkizdi. Olar Koreıa men Qytaı quramalaryna jol bergen.
Al ekinshi jarys kúni Qazaqstan quramasynyń qorjynyna taǵy bir júlde tústi.
Qazaqstandyq sportshy Nadejda Morozova 1500 metr qashyqtyqty sátti baǵyndyryp, júldegerler qatarynan tabyldy. Márege ekinshi bolyp jetken ol, jarystyń kúmis júldegeri atandy.
Sońǵy jarys kúninde qazaqstandyq konkımen júgirýshiler komandalyq sprıntten qola júlde jeńip aldy. Olar Kanada men Ońtústik Koreıa quramalaryna ǵana jol bergen.
