Qazaqstandyq kompanııalardyń qyzmetkerleri 700 aǵashty qutqardy
NUR-SULTAN. QazAqparat - Qazaqstandyq jekemenshik, memlekettik jáne kvazımemlekettik kompanııalardyń qyzmetkerleri 700 aǵashty qutqaryp, 1,4 mln lıtr sý únemdedi. Bul týraly ECOJER Qazaqstanyń óńirlik ekologııalyq bastamalar qaýymdastyǵynan málim etti dep habarlaıdy QazAqparat tilshisi.
«Qazaqstanda «Jasyl keńse« ekologııalyq jobasynyń qorytyndysy tanystyryldy. Onyń maqsaty - uıymdardyń «kómirtek izin« tómendetý, resýrstardy paıdalanýdy qysqartý, sonymen qatar qyzmetkerler men olardyń otbasy múshelerin ekomádenıetke úıretý. Jobaǵa menshik nysanyna jáne qyzmetkerleriniń sanyna qaramastan otandyq kompanııalar tartyldy. Olardyń qataryna 10 qyzmetkeri bar shaǵyn uıymdarmen qatar birneshe myń qyzmetker jumys isteıtin iri bankter de boldy», - dep atap ótedi qaýymdastyqtan.
Jobanyń ózi birneshe kezeńmen júzege asyrylady. Eń aldymen keńselerde qaldyqtardy - qaǵazdardy, shynyny, plastık pen metaldy bólip jınaýǵa arnalǵan ekojáshikter ornatylady. Sodan keıin qyzmetkerlerge qaldyqtardy odan ary óńdeý úshin suryptaý erejesi oqytylyp, únemi keńes berilip otyrady. Suryptaý daǵdyǵa aınalǵannan keıin bızneske qaldyqtar sanyn azaıtý jáne resýrstardy únemdeý boıynsha daıyn sheshimder usynylady.
«Barlyq qujat aınalymy elektrondy formatqa kóshiriledi. Kez kelgen tanystyrylymdar, qyzmettik jazbalar, kelisýler tek elektrondy túrde júrgiziledi. Bul karantın ýaqytynda óte yńǵaıly boldy. Sonymen qatar keńselerde jaryqty, sýdy jáne jylýdy únemdeýge arnalǵan tehnologııalar engiziledi. Bir rettik ydys-aıaqtardy paıdalanýdan korporatıvtik bas tartý qolǵa alynady. Óıtkeni, olar ekologııamen qatar adamnyń densaýlyǵy úshin de zııandy. Qyzmetkerler aýaǵa zııandy shyǵaryndylardy azaıtý úshin jeke kólikterimen júrýin qysqartady. Buǵan qosa, árbir keńse aı saıyn qansha resýrs únemdegendigin eseptep, kórsetkishterin jaqsarta túsýge umtylady», - dedi «Jasyl keńse» jobasynyń bastamashysy Evgenıı Muhamedjanov.
«Jasyl keńse» jobasy bir jyldyń ishinde 700 aǵashty otalýynan qorǵap qalyp, 1,4 mln lıtr sý, 69 kVt elektr energııasyn únemdep, 118 myń keli kómir qyshqyl gazynyń shyǵarylýyn qysqartqan. Búginde jobaǵa elimizdiń 85 kompanııasy men olarda jumys isteıtin 18 myń qyzmetker qatysady. Olardyń qatarynda uıaly baılanys operatorlary, bankter, qarjy uıymdary, saýda ortalyqtary, meıramhanalar men qoǵamdyq tamaqtaný oryndary bar. Taıaýda ǵana Nur-Sultan qalasynyń halyqaralyq áýejaıy da «Jasyl keńse» jobasyna qosyldy.
