Qazaqstandyq kompanııalar Slovakııada temir jol salyp jatyr
NUR-SULTAN. QazAqparat - Qazaqstandyq kompanııalar «KazakhExport» eksporttyq saqtandyrý kompanııasynyń («Báıterek» holdınginiń enshiles uıymy) qoldaýynyń arqasynda qurylys qyzmetteriniń halyqaralyq deńgeıine shyqty. Bul týraly «Báıterek» ulttyq basqarýshy holdıngi» AQ Basqarma tóraǵasy Aıdar Áriphanov málimdedi, dep habarlaıdy QazAqparat.
«2018 jyldan bastap KazakhExport qyzmetterdiń eksportyn yntalandyrý boıynsha jumysty bastady. Onyń qoldaýymen otandyq kompanııalar halyqaralyq qurylys qyzmetteri naryǵyna kire bastady. Mysaly, Slovakııada temirjol qurylysy boıynsha tenderge sátti qatysýda. Onda jobalaý jumysyn Óskemenniń «Kazgıprotsvetmet» jobalaý kompanııasy júrgizip jatyr. 2018 jylǵy jeltoqsanda Qazaqstan damý bankiniń jáne KazakhExport qoldaýymen «AAEngineering» JShS otandyq kompanııasy Qyrǵyzstandaǵy iri ken oryndarynyń birinde altyn óndiretin zaýyt salý týraly kelisimshart jasasty. Kelisimshart somasy 107 mln AQSh dollaryn quraıdy», - dedi Úkimet otyrysynda sóılegen sózinde Aıdar Áriphanov.
Onyń aıtýynsha, qazirgi ýaqytta portfelde 100 mlrd teńgeden astam somaǵa Ózbekstan («Bazıs A» - 78 mlrd teńge), Qyrǵyzstan («AAE» - 7 mlrd teńge), Reseı («Omas Integreıter» JShS - 7 mlrd teńge) sııaqty elderde burǵylaý qondyrǵylaryn jobalaý, tehnıkalyq jáne tehnologııalyq súıemeldeý qyzmetter eksporty boıynsha jobalar bar.
Búgingi tańda KazakhExport ekonomıkanyń basym sektorlarynda Qazaqstannyń barlyq óńirlerinde 80-nen astam kásiporynǵa qoldaý kórsetedi. Mysaly, eger 2018 jyly KazakhExport 90 mlrd teńge somasyna qoldaý kórsetken bolsa, onyń ishinde 49 mlrd teńge agroónerkásiptik keshen men azyq-túlik ónerkásibi kásiporyndaryna tıesili.
2018 jyldyń qorytyndysy boıynsha kapıtal 43 mlrd teńge bolǵanda «KazakhExport» eksporttyq saqtandyrý kompanııasy qoldanystaǵy saqtandyrý mindettemeleriniń kólemin 110 mlrd teńgege deıin ulǵaıtty, bul kompanııanyń menshikti kapıtalynan 2,5 ese joǵary. Aǵymdaǵy jyly kapıtaldandyrý jáne memlekettik kepildikter alý esebinen saqtandyrý kólemi aıtarlyqtaı artatyn bolady.
Osyǵan oraı, aǵymdaǵy jyly KazakhExport keminde 95 mlrd. teńge somasyna saqtandyrýdy qamtamasyz etedi, birinshi toqsanda 16 mlrd teńgeden astam somaǵa 15 joba boıynsha oń sheshim qabyldandy, onyń ishinde 11 kásiporyn buryn KazakhExport qoldaýyn paıdalanbaǵan.
