Qazaqstandyq kompanııalar Ázerbaıjanda 55 mln dollardy quraıtyn eksporttyq kelisimder jasady

BAKÝ. QazAqparat - 4-6 sáýirinde Baký qalasynda ótken saýda-ekonomıkalyq mıssııasynyń qorytyndysy boıynsha qazaqstandyq kompanııalar 55 mln dollar somasyna eksporttyq kelisimsharttar jasasty. Bul týraly QazAqparat «QazTrade» saýda saıasatyn damytý ortalyǵyna» silteme jasap habarlaıdy.

Qazaqstandyq bıznes ókilderi úshin eki eldiń ulttyq kompanııalary men isker toptarynyń qatysýymen V2V formatynda ekijaqty kelissózder, Ázerbaıjannyń iri saýda jelilerimen jáne dıstrıbıýtorlarymen kezdesýler uıymdastyryldy.

Jıynda QR Saýda jáne ıntegratsııa vıtse-mınıstri Qaırat Tórebaev atap ótkendeı, V2V kezdesýler Qazaqstannyń basqa eldermen saýda-ekonomıkalyq ózara is-qımylyn nyǵaıtýǵa múmkindik beredi.

«Qazaqstandyq kásipkerlerdi Ázerbaıjan naryǵy qyzyqtyrady. Biraq bizdiń ózara saýda áleýetimiz tipti jartylaı paıdalanylmaıdy. Bul Ázerbaıjan naryǵynda qazaqstandyq taýarlarǵa jáne Qazaqstanda Ázirbaıjan taýarlaryna suranys bar ekendigine qaramastan. Biz úshinshi elderdiń naryqtaryn birge ıgere alamyz. Sonymen qatar bizdiń aýmaqtarymyz arqyly mańyzdy halyqaralyq kólik dálizderi ótip jatyr», - dedi Qaırat Tórebaev.

Ázerbaıjan tarapynan saýda mıssııasy alańynda AR shaǵyn jáne orta bıznesti damytý agenttiginiń, Ázirbaıjan Respýblıkasynyń AZPROMO eksportty jáne ınvestıtsııalardy yntalandyrý agenttiginiń jáne basqa da iri kompanııalardyń top-menedjment ókilderi sóz sóıledi.

Bakýdegi saýda-ekonomıkalyq mıssııasynyń qorytyndysy boıynsha ázirbaıjandyq kontrpartnerlermen akkýmýlıatorlardy, tabaqty bolatty, azyq-túlikti jetkizýge arnalǵan ýaǵdalastyqtarǵa qol jetkizildi. Bakýde jasalǵan kelisimsharttardyń jalpy somasy qazirdiń ózinde 55 mıllıon dollardy qurady.