Qazaqstandyq kompanııalar Alibaba platformasynda 167,7 mln dollardyń taýaryn satqan

NUR-SULTAN. QazAqparat – Bıyl qazaqstandyq kompanııalar «Alibaba» elektrondy saýda platformasy arqyly 137,7 mln dollardyń taýaryn satqan, dep habarlaıdy QazAqparat tilshisi.

Bul týraly QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın «E-commerc Forum» atty elektrondy saýdany damytýǵa arnalǵan forýmǵa qatysýshylarǵa joldaǵan quttyqtaýynda aıtty.

«2019 jyly elektrondy saýdanyń úlesi 3,7 paıyz bolsa, 2021 jyldyń qorytyndysy boıynsha atalmysh kórsetkish 9,6 paıyzǵa jetti. Bul kórsetkish tutynýshylardyń ýaqytyn únemdeýge, taýar men qyzmet satyp alý protsesin ońtaılandyrýǵa degen talpynysyn aıqyn kórsetedi. Bıznestiń múddesinen qarasaq, onlaın saýda alys-beristiń aýqymyn keńeıtýge jáne shyǵyndardy azaıtýǵa tıimdi», - dedi mınıstr.

Vıtse-premer búginde qazaqstandyq bıznestiń «Amazon», «Alibaba», «eBay», «Wildberries» sııaqty álemdik saýda alańdaryna shyǵatyn múmkindigi bar ekenin eske saldy.

«Bıyl Alibaba market pleısinde Qazaqstannyń ulttyq pavılony ashyldy. Munda 130 qazaqstandyq kompanııa 7,5 myńnan astam taýar túrin satýǵa múmkindik alyp otyr. Atalǵan kompanııalardyń Alibaba platformasy arqyly satqan taýarynyń jalpy quny 167,7 mln dollarǵa jetti. Geografııalyq ornynyń arqasynda elimizdiń álemdik saýda aınalymynda, elektrondy saýdada senimdi tranzıttik habqa aınalyp, jetekshi rólge ıe bolatyn múmkindigi bar», - dep túıindedi Serik Jumanǵarın.