Qazaqstandyq kompanııa ónimderi Erevandaǵy kórmede eýrazııalyq óndirýshilerdiń qyzyǵýshylyǵyn týdyrdy
ASTANA. QazAqparat - «ASTANA ıÝtarııa Ltd» JShS qazaqstandyq óndiristik ınnovatsııalyq kompanııasynyń, sonymen qatar «Jasampaz» otandyq óndirýshiler konsortsıýmynyń ónimderi men tájirıbesi Erevandaǵy Eýrazııalyq aptalyq aıasynda uıymdastyrylǵan kórme barysynda eýrazııalyq jeńil ónerkásip óndirýshileriniń, kelýshilerdiń qyzyǵýshylyǵyn týdyrdy. «QazAqparat» HAA-nyń menshikti tilshisine suhbat bergen «ASTANA ıÝtarııa Ltd» kompanııalar tobynyń damý jáne strategııalyq josparlaý jónindegi dırektory Ásel Júrgenova kompanııanyń tarıhy jáne eýrazııalyq áriptester tarapynan týyndaǵan qyzyǵýshylyq jaıynda aıtyp berdi.
«ıÝtarııa» kompanııalar toby 2013 jyly quryldy. Bizdiń eki óndiristik alańymyz bar, biri Qaraǵandy oblysynda, ekinshisi Astana qalasynda ornalasqan. 2013 jyly Bıznestiń jol kartasy boıynsha Astana ındýstrıaldy parkiniń aýmaǵynda tolyq júktemege kóshken kezdegi óndiristik qýaty 1,5 mıllıonnan astam buıymdy quraıtyn «KazTexExpo» avtomattandyrylǵan óndiristik kesheni jobasy salyndy. Búgingi kúni óndiristik qýat júktemesi 17 paıyzdy qurap otyr», - dedi Á.Júrgenova.
Onyń aıtýynsha, «ıÝtarııa» kompanııasy ónimniń keń aýqymdy túrin shyǵarady. Olardyń qatarynda: túrli salanyń arnaıy kıim-keshekteri, úıge arnalǵan toqyma matalar, trıkotaj, klassıkalyq kostıýmder bar.
«2017 jyly «Jasampaz» otandyq taýar óndirýshilerdiń konsortsıýmy quryldy. Konsortsıým qurylǵan sátte onyń quramyna 5 kompanııa kirse, búginde shıkizat pen qatar daıyn ónimderdi shyǵaratyn 51 iri kásiporynnyń basyn qosyp otyr. Konsortsıým qatysýshylarynyń negizi maqsaty - kúsh-jigerlerin shoǵyrlandyrý arqyly Qazaqstanda jeńil ónerkásip ónimderi óndirisin tolyqtaı jolǵa qoıý», - dedi Á.Júrgenova.
Á.Júrgenovanyń atap ótýinshe, Erevanda ótken Eýrazııalyq apta aıasyndaǵy kórmede qazaqstandyq jeńil ónerkásip kompanııalarynyń ónimderi men tájirıbesi armenııalyq óndirýshilermen qatar reteılerdiń tarapynan da zor qyzyǵýshylyq týdyrǵan.
«Erevan kórmesine qatysqanymyzda armenııalyq áriptester tarapynan kompanııamyzdyń jumys tájirıbesine aıryqsha qyzyǵýshylyq baıqaldy. Ásirese, olar bizdiń Qazaqstan Qorǵanys mınıstrligimen yntymaqtastyq úlgisindegi memleket pen jeke sektordyń ózara paıdaly ári tıimdi is-qımyl modelin qalyptastyrǵanymyzǵa erekshe nazar aýdardy.
Armenııalyq áriptesterimiz Qazaqstanda, bizdiń óndiristik qýatymyzdyń bazasynda mata óndiretindigimizge qatty tańǵaldy. Búgingi kúni shymkenttik maqta-mata zaýytynda qaıta óńdelip, daıyn ónim shyǵarylady. Al 2016 jylǵa deıin maqta negizinen eksportqa shyǵarylyp kelgen bolatyn. Mata múldem daıyndalmaıtyn.
Postkeńestik keńistikte mata óndirisi eń aldymen Reseı jáne Belarýs elderinde jolǵa qoıylǵan edi. Al basqa memleketterge laıyqty deńgeıde nazar aýdarylmaıtyn. Degenmen, atalǵan kórme aıasyndaǵy bir alańdaǵy tyǵyz jumystardyń arqasynda kompanııamyzdyń eksporttyq áleýeti ashyla tústi.
Armenııanyń arnaıy kıim-keshek shyǵaratyn 2 kompanııasy qazaqstandyq shıkizatqa qyzyǵýshylyq tanytyp otyr. Buǵan qosa, taǵy bir armenııalyq reteıler bizdiń trıkotaj buıymdarymyzǵa nazaryn aýdardy. Biz úshin bul daıyn ónim eksporty degen sóz. Barlyǵymen de odan arǵy yntymaqtastyqty damytý joldaryn tyńǵylyqty ýaǵdalastyq», - dedi Ásel Júrgenova.
