Qazaqstandyq kompanııa kıberqaýipsizdiktiń álemdik kóshbasshysymen yntymaqtasady

NUR-SULTAN. QazAqparat –Qazaqstandyq T&T Security kompanııasy kıberqaýipsizdik salasynyń álemdik kóshbasshysy Trend Micro Incorporated kompanııasymen yntymaqtasady. Búgin atalǵan kompanııalar ǵylymı jáne tehnıkalyq yntymaqtastyqty bastaý týraly kelisimge qol qoıdy, dep habarlaıdy QazAqparat tilshisi.

«Bul bizdiń mınıstrlik úshin de óte qýanyshty oqıǵa. Biz T&T Security ónimderimen alǵash ret 2016 jyly tanysqan edik. Sol kezde tanymal emes qazaqstandyq ónimdi satyp alyp, mınıstrlikte tabysty engizdik. Biz qýanyshtymyz, sebebi kıberqaýipsizdik salasynda álemdik jetekshi kompanııalardyń biri Trend Micro Incorporated pen T&T Security qazaqstandyq ónimdi ázirleý jáne nyǵaıtý boıynsha ózara mindetteme alady», - dedi shara barysynda QR Tsıfrlyq damý, ınnovatsııa jáne aeroǵarysh ónerkásibi mınıstrliginiń Aqparattyq qaýipsizdik komıteti tóraǵasynyń orynbasary Rýslan Ábdiqalyqov.

Onyń aıtýynsha, vedomstvo barlyq ýaqytta da qazaqstandyq ázirleýshilerge qoldaý kórsetip keledi.

«Bir jaǵynan munda bizdiń mınıstrliktiń de eńbegi bar dep esepteımiz. Óıtkeni, osy jyldar boıy biz otandyq ázirleýshilerdi qoldaýǵa tyrystyq jáne bul isti jalǵastyryp ta kelemiz. Sol arqyly elimizdegi shaǵyn ári eshkimge belgisiz ónim memlekettik qoldaýdyń kómegimen kıberqaýipsizdik salasyndaǵy álemdik kóshbasshylarmen kelisimshart jasasý deńgeıine deıin shyǵa alatyndyǵyna úlgi retinde kórsetkimiz keledi», - dedi Rýslan Ábdiqalyqov.