Qazaqstandyq komanda AQSh shahmatshylaryn jeńdi
NUR-SULTAN. QazAqparat – Qazaqstan shahmatshylarynyń birikken quramasy AQSh sportshylaryn 2:0 esebimen jeńdi, dep habarlaıdy QazAqparat Qazaqstan shahmat federatsııasynyń saıtyna qyzmetine silteme jasap.
«Qazaqstan shahmat federatsııasy bizdiń shahmatshylarymyz ben áýesqoılarymyzdy Qazaqstannyń birikken quramasynyń chess.com oıyn platformasynda ótken «Nations League 2020» (Ulttar lıgasy 2020) komandalyq onlaın jarysta tamasha óner kórsetýimen quttyqtaımyz. Qazaqstandyq komandanyń AQSh shahmatshylarymen sońǵy matchy ótip, bizdiń sportshylarymyzdyń 2:0 esebimen utty. Qazaqstan osy jeńisimen Nations League 2020 jarysynda ekinshi orynǵa turaqtady, delingen habarlamada.
Qazaqstandyq shahmatshylar alty apta boıy vırtýaldyq shahmat taqtasynda AQSh, Anglııa, Polsha, Rýmynııa, Grekııa, Argentına jáne Brazılııadaǵy qarsylastarymen kezdesti. Kezdesýdiń jalpy qorytyndysy: bes jeńis, bir teń oıyn jáne bir ret jeńilis.
Halyqaralyq onlaın jarystyń barysynda Qazaqstan quramasy úshin oıyndarǵa elimizdiń kóptegen myqty shahmatshylary, halyqaralyq grossmeısterler men sheberler qatysty, olardyń arasynda ulttyq qurama músheleri R.Hýsnýtdınov, Á.Ismaǵambetov, D.Mahnev, R.Jalmahanov, G.Dáýletova, Á.Serikbaı, N.Nurǵalı jáne taǵy basqalary boldy.
«Komandanyń jeńisi respýblıkada jyl saıyn tamyzdyń úshinshi jeksenbisinde atap ótiletin Sport kúnine qarsy tamasha syılyq boldy», delingen habarlamada.
Eske sala ketsek, Qazaqstandyq shahmatshylar AQSh komandasyna qarsy onlaın match ótkizetini, oǵan eriktiler izdestirilip jatqany habarlanǵan edi.
