Qazaqstandyq qolóner sheberleri ózderin salyqtan bosatýdy suraıdy
ALMATY. Jeltoqsannyń 7-i. QazAqparat /Erbol Azanbek/ -Elimizde qolóner salasynyń damyp, básekege qabiletti bolýy úshin olar salyqtan bosatylýy tıis. Bul týraly Almatyda ótken «Shyǵys jańa jyly» atty Ortalyq Azııalyq kórme-jármeńke barysynda qolónershi Roza Sársebaeva aıtty,
dep habarlaıdy QazAqparat.
Onyń aıtýynsha, bul elimizdegi kóptegen qolónershilerdiń usynysy.
«Búgingi kórmege Ortalyq Azııanyń 5 elinen qolónershiler keldi. Jalpy osyndaı kórme elimizde jylyna 3 ret ótkizilip turatyndyqtan, kórshi elderdegi qolónershilermen, olardaǵy ahýalmen jaqsy tanyspyz. Olardyń kópshiliginde qolónershiler salyqtan bostylyǵan. Óıtkeni, qolóner jumysy aýyr, ár ónim jeke qolmen jasalatyndyqtan, ónimder qymbat. Osyǵan baılanysty taýarlardyń da ótimi az. Buny sezingen kórshi elderdiń úkimetteri qolónershilerdi salyqtan bosatyp otyr. Nátıjesinde, búgingi kórmede baıqaǵanymyz, kórshi elderden kelgen qolóner sheberleriniń buıymdary bizdegiden arzandaý, ári ótimdi bolyp jatyr. Úkimet tarapynan bul jeńildik qazaqstandyq qolónershilerge de jasalsa», deıdi sheberler.
Qazaqstandyq áriptesiniń sózin ózbekstandyq qol óner sheberi Matlıýba Abekeeva da qoldaıdy. «1997 jyly Ózbekstan Prezıdentiniń jarlyǵymen Ózbekstan qolónershileri salyqtan bosatylǵan. Qazir bul salada ájeptáýir ilgerleýshilik bar. Búgingi tańda bizdiń sheberlerdiń buıymdary arzan, ári ótimdi», deıdi ózbekstandyq sheber.
