Qazaqstandyq qoǵamdaǵy jańǵyrtýdyń basty qozǵaýshysy - Uly dalanyń rýhanııaty
ASTANA. QazAqparat - Elordada «Uly dalanyń rýhanı murasy: ótkeni men búgini» degen taqyryppen halyqaralyq ǵylymı konferentsııa ótýde, dep habarlaıdy QazAqparat.
«Táýelsizdik alǵan alǵashqy jyldary ekonomıkalyq, quqyqtyq jáne áleýmettik-saıası reformalardy júzege asyrýda elimiz biraz qıyndyqtardy bastan keshirdi. Soǵan qaramastan eldegi birlik pen kelisimniń, ultaralyq tatýlyqtyń saqtalýy az ýaqyttyń ishinde el ekonomıkasy men demokratııalyq áleýmettik protsestiń serpindi damýyna úlken yqpal etti. Bizdiń oıymyzsha, qazaqstandyq qoǵamdaǵy jańǵyrtýdyń basty qozǵaýshysy qoǵamdaǵy kelisim, jaǵymdy bátýa, Uly dalanyń rýhanııaty bolyp tabylady», - dedi jıynnyń ashylýynda sóz sóılegen QR Tuńǵysh Prezıdenti - Elbasy kitaphanasy bas dırektorynyń orynbasary Ámirhan Rahymjanov.
Sonymen qatar ol Elbasynyń kóregendigi men strategııalyq kózqarasynyń durystyǵyn Qazaqstannyń damý tarıhy rastap bergendigin basa aıtty.
«Qazaqstandyqtar men álemdik qoǵamdastyqtyń sanasyndaǵy Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev óziniń maqsattylyǵymen jáne syndarly saıasatymen halyqtyń birligin, memlekettik aýmaǵynyń tutastyǵyn, Konstıtýtsııanyń myzǵymastyǵyn, azamattardyń quqyqtary men bostandyqtaryn, qaýipsizdigin qamtamasyz etetin Táýelsiz memlekettiń negizin qalaýshy bolyp sanalady. Ony Elbasy óziniń «Bolashaqqa baǵdar: rýhanı jańǵyrý» atty maqalasynda anyq kórsetedi», - dedi Á.Rahymjanov.
Konferentsııa barysynda QR Prezıdenti N.Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyn júzege asyrý aıasynda ázirlengen «Uly dalanyń qorǵaýshylary» kitaby men onyń elektrondy nuqsasy, tarıh ǵylymdarynyń doktory, professor Qadyrjan Ábýevtiń «Qazaq-orys qatynastary konteksindegi Sibir handyǵy», «Shoqan Ýálıhanov» kitaptarynyń tanystyrylymy ótti. Munan bólek «Halyq tarıh tolqynynda» salalyq baǵdarlamasy júzege asyrý aıasynda elimizdiń ǵalymdary ázirlegen 5 mongorafııa da alǵash ret oqyrman nazaryna usynyldy.
