Qazaqstandyq qoǵam sanaly jáne durys tańdaý jasaýǵa jetildi - sarapshy Á.Káýkenov
ASTANA. QazAqparat - Qazaqstandyq qoǵam sanaly jáne durys tańdaý jasaýǵa jetildi, dep esepteıdi sarapshy Ádil Káýkenov.
«Qazaqstanda qoǵam jetildi dep aıta alamyz. Ol talaı kezeńderden ótip, sanaly ári durys tańdaý jasaıtyn qoǵamǵa aınaldy. Sońǵy jyldary Qazaqstannyń damýy, qol jetkizgen turaqtylyǵymyz, elordany jáne ózge de oblystardy órkendetýdegi jemisterimiz - bul barlyq azamat qoldaıtyn vektor jáne barsha qazaqstandyq oǵan úles qosýǵa talpynady», - dedi Á.Káýkenov.
Onyń sózine qaraǵanda, «qoǵamnyń ár jaýapty múshesi saılaý - eldiń jetistigin nyǵaıtyp, onyń demokratııaǵa degen baǵytyn kúsheıtetin element ekenin túsinedi». «Ashyǵyn aıtsaq, saılaýǵa deıin de qazaqstandyqtardyń daýys berýge keletini belgili boldy. Bul qazaqstandyqtar jáne jalpy qazaqstandyq qoǵamnyń joǵary damý kezeńinen ótip jatqanymen baılanysty. Bul órkendeý qoǵamnyń ár múshesine naqty jáne aıqyn seziletin jetistikter ákeledi. Qazaqstandyqtar bul múmkindikti saqtap qalǵysy keletinderi túsinikti»,- dedi ol.
