Qazaqstandyq klýbtardyń eýrokýbok oıyndaryndaǵy qarsylastary anyqtaldy
ASTANA. QazAqparat - Fýtboldan eýrokýbok oıyndarynda synǵa túsip jatqan qazaqstandyq «Astana», «Qaırat» jáne «Tobyl» komandalary birinshi irikteý kezeńinen irkilmeı ótip, jarystyń kelesi satysyna shyqty. Olardyń ekinshi irikteý kezeńindegi qarsylastary belgili boldy, dep habarlaıdy QazAqparat tilshisi.
Chempıondar lıgasynda el namysyn qorǵap júrgen elordalyq klýb endi Danııanyń «Mıdtıýllann» komandasymen kezdesedi. Atalmysh komandanyń qurylǵanyna jıyrma jylǵa jýyqtady. Komanda 1999 jyly jasaqtalǵan. Jergilikti «Ikast» jáne «Hernıng Fremad» komandarynyń birigýiniń nátıjesinde qurylǵan. 2014/2015 jylǵy fýtbol maýsymynda atalmysh komanda tuńǵysh ret óz eliniń chempıony ataǵyna qol jetkizdi. Odan keıin bıylǵy fýtbol maýsymynda sol jetistigin qaıtalady. Al 2006/2007, 2007/2008 jylǵy dop dodasynda kúmis júldeger boldy. Sondaı-aq, olar 5 márte kúmis júldege qol sozdy. Búgingi kúnge deıin eýrokýbok oıyndarynda birneshe márte synǵa túsip, mol tájirıbe jınaqtap úlgerdi. Ázirge qol jetkizgen joǵary jetistigi - 2015/2016 jylǵy Eýropa lıgasynyń toptyq kezeńinde synǵa túsýi. D tobynda Italııanyń «Napolı», Belgııanyń «Brıýgge» jáne Polshanyń «Legııa» klýbtarymen baq synasqan olar ekinshi oryn alyp, jarystyń kelesi satysynda Anglııanyń «Manchester ıÝnaıted» klýbymen jup qurady. Atalmysh qarsylasymen óz alańynda kezdesýinde danııalyqtar 2:1 esebimen jeńiske jetkenimen, syrt alańda 1:5 esebimen oısyraı jeńildi. Odan keıingi eki jylda da olar Eýropa lıgasynyń pleı-off kezeńine deıin jetip júrgenin jankúıerler jaqsy biledi. Endeshe, «Astana» úshin olar ońaı qarsylas emes. Elordalyq klýbtyń atalmysh qarsylasymen alǵashqy kezdesýi 24 shildede óz alańynda bolsa, 1 tamyzda syrt alańda bolady.
Eýropa lıgasynyń ekinshi irikteý kezeńine shyqqan Almatynyń «Qaıraty» endi Gollandııanyń AZ klýbymen sheberlik baıqasady. Gollandııanyń Alkmaar qalasynyń namysyn qorǵaıtyn atalmysh klýb elimizdiń jankúıerlerine jaqsy tanys. Olar 2010 jyly Eýropa lıgasynyń pleı-off satysynda qazaqstandyq «Aqtóbe» klýbymen kezdesti. Aqtóbede olar 1:2 esebimen jeńilgenimen, óz alańynda 2:0 esebimen basym tústi. Odan keıin AZ bizdiń «Shahtermen» toptyq kezeńde jolyqty. L tobynda jolyqqan qos komanda arasyndaǵy jekpe-jekte AZ óz alańynda 1:0 esebimen jeńiske jetse, bizdiń elimizde 1:1 esebimen teń oınady. AZ komandasy 1967 jyly qurylǵan. Óz oıyndaryn 17 myńnan astam jankúıer sııatyn AFAS stadıonynda ótkizedi. Gollandııa birinshiliginiń 2 márte chempıony bolsa, 2 márte kúmis júldegeri atanyp, 7 márte qola medaline qol sozdy. «Qaırat» pen AZ klýbtary 26 shilde jáne 2 tamyz kúnderi oınaıdy.
Qostanaıdyń «Tobyly» ekinshi irikteý kezeńinde Armenııanyń «Pıýnık» klýbymen kezdesedi. Armenııalyq klýb jańa ǵana syrt alańda Makedonııanyń «Vardar» klýbyn 2:0 esebimen tize búktirdi. Qos komandanyń alǵashqy kezdesýi de 1:0 esebimen «Pıýnıktiń» jeńisimen aıaqtaldy. «Pıýnık» Armenııa astanasy - Erevan qalasynyń namysyn qorǵaıdy. Komanda 1992 jyly qurylǵan. Armenııanyń 11 dúrkin chempıony ataǵyn jeńip alǵan. «Pıýnık» budan buryn da qazaqstandyq klýbpen sheberlik baıqasty. 2014 jyly Eýropa lıgasynda elordalyq «Astana» klýbymen sheberlik baıqasqan atalmysh klýb 1:4, 0:2 esepterimen jeńilip qaldy. «Tobyl» «Pıýnıkti» 26 tamyzda óz alańynda qabyldasa, 2 tamyzda Armenııaǵa qonaqqa barady.
