Qazaqstandyq klýbtar QHL jáne JHL matchtaryn bastaıdy
ASTANA. 24 jeltoqsan. QazAqparat - Erteń, 25 jeltoqsan kúni Joǵary hokkeı lıgasynda óner kórsetip júrgen «Saryarqa» (Qaraǵandy) jáne «Qaztsınk-Torpedo» (Óskemen) hokkeı klýbtary kezekti matchtaryn ótkizedi.
«Saryarqa» syrt alańda «Sokol» komandasymen kezdesse, «Qaztsınk-Torpedo» óz alańynda «Chelmetti» qabyldaıdy. Aıta ketken jón, týrnırlik kestede Qaraǵandy qalasynyń quramasy 4-shi orynda keledi. Al Óskemenniń hokkeı klýby - 10-shy orynda. Astana qalasynyń «Barys» komandasy bolsa, 26 jeltoqsanda «Admıralmen» kúsh synasyp kóredi. Bul match elordadaǵy «Qazaqstan» sport kesheninde ótpek.
Aıta keteıik, Eýropada ótken sport dodalaryna baılanysty QHL men JHL matchtary ýaqytsha toqtatylǵan bolatyn. Italııanyń Trentıno qalasynda ótken Búkilálemdik qysqy stýdentter Ýnıversıadasyna Qazaqstannyń barlyq derlik hokkeı klýbtarynyń oıynshylary qatysty. Olardyń ishinde «Barys», «Qaztsınk-Torpedo», «Saryarqa», «Nomad» jáne «Snejnyı barys» syndy komandalar bar. Ýnıversıadanyń qorytyndysy boıynsha Qazaqstan quramasynyń oıynshysy, «Qaztsınk-Torpedonyń» shabýylshysy Evgenıı Rymarev úzdik bolyp tanyldy. Ol 6 matchta 7 gol soǵyp, 7 nátıjeli shaıba berdi. 14 upaımen Rymarev týrnırdiń úzdik shabýylshysy atandy. Odan keıingi orynda onyń seriktesi, 6 matcha 13 upaı jınaǵan Aleksandr Shın tur.
