Qazaqstandyq klýbtar Eýropa lıgasynda «Zenıt» jáne «Mılanmen» oınaýy múmkin
ASTANA. QazAqparat - Eýropa Lıgasynyń úshinshi irikteý kezeńinde qazaqstandyq «Qaırat», «Ertis» jáne «Ordabasy» klýbtarynyń joly túıisýi múmkin komandalar belgili boldy, dep habarlaıdy Sports.kz.
Aıta keteıik, Eýropa lıgasynyń 2017/18 jylǵy maýsymynda qazaqstandyq klýbtardyń ishinde «Qaırattyń» klýbtyq koeffıtsıenti eń joǵary - 5.550, alaıda onyń ózi týrnırdiń iriktelgen komandalarynyń qataryna qosyla almaıdy. Sáıkesinshe, «Ertis» pen «Ordabasy» da úshinshi raýndqa ótken kúnniń ózinde úzdikter qataryna ilikpeıdi.
Yqtımal qarsylastarynyń (joǵary koeffıtsıentten bastap) tizimi mynadaı: «Zenıt» (Reseı), «Atletık» (Ispanııa), «Fenerbahche» (Túrkııa), «Sparta» (Chehııa), «Mılan» (Italııa), PSV (Nıderlandy), «Braga» (Portýgalııa), «Gent» (Belgııa), PAOK (Gretsııa), «Krasnodar» (Reseı), «Bordo» (Frantsııa), «Everton» (Anglııa), «Marsel» (Frantsııa), «Dınamo Zagreb» (Horvatııa), «Fraıbýrg» (Germanııa), «Aýstrııa» (Aýstrııa), «Panatınaıkos» (Gretsııa) jáne «Marıtımý» (Portýgalııa). Qalǵan áleýetti qarsylastar keıinirek belgili bolady.
Alaıda, qazaqstandyq komandalardyń aldynda úshinshi irikteý raýndyna shyǵý máselesi tur: Máselen, «Atlantasty» tas-talqan etip jeńgen «Qaırat» albanııalyq «Skenderbeýmen» kezdesý jaıly josparlaı berse bolady, al «Dýnaıdy» mınımaldy eseppen jeńgen «Ertis» pen «Shırokı Brıegten» utylǵan «Ordabasynyń» úshinshi kezeń týraly oılaýyna áli ertrek. Alda qarymta kezdesýler tur. Alaıda, bul synnan sátti ótse, «Ertis» serbııalyq «Tsrvenaıa Zvezdamen», al «Ordabasy» shotlandııalyq «Aberdınmen» baq synaıdy.
