Qazaqstandyq kınoteatrlarda 10 qarashadan bastap "Meniń kúnáli perishtem" fılmi kórsetiledi
ALMATY. 2 qarasha. QazAqparat /Erlik Erjanuly/ - Bas keıipkerlerimdi ishki túısik arqyly tańdadym. Ony "Meniń kúnáli perishtem" fılminiń rejısseri búgin týyndyny Almatyda "Qazaqfılm" kınostýdııasynda buqaralyq aqparat quraldary ókilderine tanystyrý kezinde aıtty.
Sháken Aımanov atyndaǵy "Qazaqfılm" AQ-y men "Kentavr prodaksh" JShS-i birlesip túsirgen bul fılmniń janry - jastar kınosy. Uzaqtyǵy 1,3 saǵat bolatyn kınotýyndyda basty keıipkerler Azamat pen Aıshany somdaǵan Danııar Qanatqalıev pen Quralaı Anarbekovanyń bul kınodaǵy alǵashqy rólderi.
"Bastapqyda oǵan júzdegen úmitkerlerdiń arasynan iriktep alynǵan basqa akterlar bekitilgen bolatyn. Alaıda sońǵy sátte eshqandaı foto jáne beıne tekserýsiz ishki túısikpen Danııar men Quralaıdy tańdap aldym. Danııar oqý ornyn bitirgen jas akter, al Quraılaıdyń múlde akterlik kásibı bilimi joq. Osyǵan qaramastan ekeýi de senimdi tolyq aqtap shyqty", - deıdi rejısser T. Temenov.
