Qazaqstandyq kınofılmder 11 halyqaralyq júldeni jeńip aldy

ASTANA. QazAqparat - Bıyl Qazaqstannyń kınoındýstrııasy úshin jemisti jyl boldy. Búgin QR Prezıdenti janyndaǵy  Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııasynyń kezekti otyrysynda QR Prezıdenti Ákimshiligi Іshki saıasat bóliminiń meńgerýshisi Aıda Balaeva osylaı aıtty, dep habarlaıdy QazAqparat tilshisi. 

«Teatr men kıno árdaıym qazaqstandyq mádenıettiń mańyzdy aspektileri bolyp tabylady. Sondyqtan túrli formattaǵy sharalar keshenin uıymdastyrdyq. Olardyń ishinde qazaqstandyq opera jáne balet trýppalarynyń belsendi gastroldik qyzmeti de bar. «Astana opera», Abaı atyndaǵy opera jáne balet teatry, «Astana balet» jáne basqa da ujymdar Eýropa men Azııa elderiniń kórermenderin ulttyq opera qoıylymdarymen tanystyryp júr», - dedi Aıda Balaeva jumys tobynyń otyrysynda.

Onyń aıtýynsha, 2018 jyly Qazaqstan halyqaralyq arenadaǵy túrli kınofestıvalderge belsene qatysty.

«Bıyl Mádenıet jáne sport mınıstrliginiń qoldaýymen 71-shi Kann kınofestıvalinde Qazaqstan pavılony ashyldy. Onda «Eýrazııa» halyqaralyq kınofestıvaliniń tanystyrylymy ótti, sondaı-aq birqatar qazaqstandyq fılmderdiń treılerleri kórsetildi. Jyl basynan beri «Qazaqfılm» AQ 18 fılmi 14 halyqaralyq kınofestıvalge qatysyp, 11 júlde jeńip aldy», - dedi bólim meńgerýshisi.

Ol «Anaǵa aparar jol» fılminiń Nıý-Iorktegi WeLink Halyqaralyq kınofestıvalinde «Úzdik kórkem fılm» júldesin ıelengenin de eske saldy. Mádenıet mınıstrliginiń tapsyrysymen jáne metsenattardyń qoldaýymen túsirilgen «Ámire» fılmi Silver screen film (Sılver skrın fılm) marapatyn alǵan. Sonymen qatar, bul týyndy Gollıvýdtaǵy kınofestıvaldiń aqtyq synyna shyqqan.

«Qazaqstandyq kıno kúnderi de jaqsy nátıje berýde. Bıyl qazaqstandyq kıno kúnderi Italııada, Estonııada jáne ózge de elderde uıymdastyryldy», - dedi A.Balaeva.

Esterińizge sala keteıik, búgin Astanada Qoǵamdyq sanany jańǵyrtý baǵdarlamasy jónindegi ulttyq komıssııanyń otyrysy ótti.