Qazaqstandyq kınodramatýrg qytaılyq áriptesterine Jibek joly týraly ortaq joba jasaýdy usyndy
ALMATY. QazAqparat - Almatyda Qytaı kınofestıvali aıasynda Shyńjań Uıǵyr avtonomııalyq aýdany kınosynyń kúnderi ótip jatyr, dep habarlaıdy QazAqparat tilshisi.
Búgin Sháken Aımanov atyndaǵy «Qazaqfılm» kınostýdııasyna ShUAA aqparat, baspasóz jáne teleradıo basqarma basshysy Ýan Shychen bastaǵan bir top qytaı kınematografısteri keldi.
Qytaı kınematografısterin «Qazaqfılmniń» Eksperttik keńesiniń teń tóraǵasy Bekbolat Shekerov jáne qazaq kınosynyń metrleri Asanáli Áshimov, Satybaldy Narymbetov sııaqty belgili kınematografıster qarsy aldy. Qytaıdan kelgen qonaqtarǵa kınostýdııa aýmaǵynda ekskýrsııa jasaldy.
Olarǵa «Qazaq handyǵy» serıalynyń dekoratsııasy, túsirilim alańdary, kostıým qoımasy, taspa-zerthanalyq kesheni kórsetildi.
Sondaı-aq qonaqtarǵa qazir óndiriste júrip jatqan «Muzbalaq» tolyq metrajdy anımatsııalyq fılminiń treıleri kórsetildi.
«Qazaqfılm» kınostýdııasyna qonaqqa kelgenderińizge qýanyshtymyz. Ózderińiz biletindeı, 9 maýsym kúni Qytaı baspasóz, kıno, radıo jáne telekórsetilim máseleleri boıynsha memlekettik ákimshilik pen Qazaqstan Respýblıkasy mádenıet jáne sport mınıstirligi arasynda kıno óndiris salasy boıynsha Úkimetaralyq kelisimge qol qoıyldy. Bul qujat boıynsha bizdiń memleketterdiń kınomatografısteri birlesken jobalar jasaýǵa múmkindik alady. «Qazaqfılm» kınostýdııasynda «Kompozıtor» atty Qazaqstan-Qytaı birlesken jobasyn júzege asyra bastaǵanyn aıtqym keledi. Bul joba eki el kınomatografısteri arasyndaǵy altyn kópir bolady dep úmittenemin», - dedi, «Qazaqfılmniń» Eksperttik keńesiniń teń tóraǵasy Bekbolat Shekerov.
Óz kezeginde, ShUAA aqparat, baspasóz jáne teleradıo basqarma basshysy Ýan Shychen qazaqstandyq kınematografısterge qurmet kórsetkenderi úshin alǵysyn bildirdi.
«Bizge tarıhy mol kınostýdııany kórýge múmkindikti bergenderińizge alǵys bildiremiz jáne biz birlesken jobalar týraly sizderdiń usynystaryńyzdy qarastyrýǵa daıyn ekenimizdi atap ótkim keledi», - dedi Ýan Shychen.
Dóńgelek ústel barysynda áriptester Qazaqstan men Qytaı kınematografııasyndaǵy máseleler men jetistikter týraly pikir almasty. Kınodramatýrg Nurlan Sanjar qytaılyq áriptesterine Jibek joly týraly joba jasaýǵa usynys tastady. Ulty qazaq qytaılyq akter Danııar Tolqyn «Qazaqfılmniń» «Tumar» kınokartınasynyń kastıngine qatysyp úlgerdi.
Esterińizge sala keteıik, 2017 jyldyń 10 maýsymynda Almaty qalasynda Qytaı kınofestıvali aıasynda «Kinopark 11 IMAX 3D» kınoteatrynda Shyńjań Uıǵyr avtonomııalyq aýdany kınosy kúnderiniń saltanatty ashylýy boldy.
Almatyda ótken is-sharaǵa Qytaıdan úlken delegatsııa keldi, olardyń ishinde: ShUAA aqparat, baspasóz jáne teleradıo basqarma basshysynyń orynbasary Lıý E, «Shyńjań» kınostýdııasynyń basshysynyń orynbasary Murat Mámet, prodıýser Tabys Jaqııa, akterler: Danııar Tolqyn, Qundyz-aı Tash, Abdýkerim Ablız, Dilshat Barat jáne basqalar bar.
Shyńjań kınosy kúnderiniń ashylýynda «Aqshanyń álegi» kınokomedııasy kórsetildi. Sondaı aq, is-shara aıasynda 15 men 28 maýsym aralyǵynda taǵy da úsh kınokartına kórsetiledi: «Arman asýy» (rej. Sý Leı); «Gúlbıke» jáne «Shynaıy mahabbat» (rej. Sherzat ıAqub).
Kıno kórsetilimderi Esentaı saýda ortalyǵyndaǵy «Kinopark 11» IMAX 3D» kınozalynda ótedi. Kirem deýshilerge esik ashyq.
