Qazaqstandyq kınematografıster Qazanda ótetin musylman kınofestıvaline qatysady
ASTANA. 5 qyrkúıek. QazAqparat - Qazanda VIII halyqaralyq musylman kınosynyń festıvali ashylady. Onyń qonaqtary: rejısserler Andreı jáne Egor Konchalovskııler, aktrısalar Alla Býdnıtskaıa, Marına Zýdına, akterler Sergeı Shakýrov, Dmıtrıı Pevtsov jáne Chehııadan kelgen kınosynshy Vera Langerova.
Qazanda ótetin musylman kınosynyń halyqaralyq festıvali 2005 jyldan 2010 jylǵa deıin «Altyn minber» atalyp kelgen bolatyn. Al festıvaldyń quryltaıshylary Tatarstan mádenıet mınıstrligi, Reseı musylmandar basqarmasy jáne Qazan merııasy bolyp tabyldady. Kınoforým Tatarstan basshylyǵynyń qamqorlyǵymen ótedi. «Festıvaldiń qurmetti qonaqtary Reseı Federatsııasynyń múftıi Ravıl Gaınýtdın, Túrik Respýblıkasynyń Mádenıet jáne týrızm mınıstri Farýk Shahın, halyqaralyq TÚRKSOI uıymynyń bas hatshysy Dúısen Qaseıinov bolady» dep habarlaıdy uıymdastyrý komıteti.
Bıyl irikteý komıssııasynyń talqysyna 55 elden 300-den astam fılm kelip tústi. Nátıjesinde baıqaý baǵdarlamasyna 28 elden 40 eńbek (tolyqmetrajdy kórkem fılmder, qysqametrajdy jáne tolyqmetrajdy derekti fılmder) tańdap alynǵan. Baıqaýǵa Úndistan, Túrkııa, Iran, Qyrǵyzstan, Qazaqstan, Fınlıandııa, Polsha, Bahreın, Reseı men basqa da elder qatysady.
Atalymdar boıynsha jeńimpaz atanǵandar 12 basty júlde - Qazan kremliniń beınesindegi músinshelerge ıe bolady.
