Qazaqstandyq kınematografıster Gollıvýd pen Eýropanyń rejısserlarymen birge kıno túsirýge nıetti
ALMATY. 7 tamyz. QazAqparat - Almatyda 17-22 qyrkúıek kúnderi ótetin VIII «Eýrazııa» halyqaralyq kınofestıvaliniń qazylar alqasyna Volfgang Peterson tóraǵalyq etpek.
Bul týraly kınofestıvaldi uıymdastyrýshylar búgin Almatyda ótken baspasóz máslıhatynda málimdedi.
«Eýrazııa» kınofestıvalin biz birinshi kezekte qazaqstandyq kınematografıster úshin jańa keńistikter ashyp berý maqsatynda paıdalanǵaly otyrmyz. Oǵan álemdik kınoındýstrııada tabysty jumys istep jatqan halyqaralyq, álemdik deńgeıdegi negizgi ınstıtýttardyń kópshiligi keledi. Biz olarmen ózara yntymaqtastyq jónindegi kelisimsharttarǵa qol qoısaq, Gollıvýd pen Eýropadaǵy rejısserlarmen, ulttyq qorlarmen birlesip kıno túsirýge jańa múmkinshilikter ashylady», - deıdi «Eýrazııa» halyqaralyq kınofestıvaliniń prezıdenti Ermek Amanshaev.
Onyń aıtýynsha, bul shara elimizdegi kıno óndirisiniń búgingi tańdaǵy damý deńgeıiniń kórsetkishi bolmaq. Baıqaýǵa qatysatyn kınokartınalardyń tizimi 15 tamyz kúni belgili bolmaq. Bul týraly festıvaldiń saıtynan (www.eurasiaiff.kz ) bilýge bolady.
