Qazaqstandyq kezekti qaýipti rekordyna daıyndalýda
ASTANA. QazAqparat - Qazaqstandyq rekordshy Sergeı Tsyrýlnıkov kezekti rekordyna daıyndalyp jatyr, dep habarlaıdy QazAqparat tilshisi.
«Sizdermen bóliseıin dep edim: maǵan táýekeli joǵary avantıýra usynyldy. Bir jaǵynan, bul óte keremet! Ekinshi jaǵynan, bul óte qaýipti, jaraqat pen aýyr saldarǵa ákep soqtyrýy múmkin. Maǵan 25 jylytqyny (ishine sý quıylatyn medıtsınalyq rezeńke ydys) úrlep, jarýdy usynyp jatyr», - dep jazdy ol Feısbýktegi paraqshasynda.
Balýannyń aıtýynsha, besinshi jylytqydan keıin ottegi jetispeýshiligi týyndaıtyndyqtan, bul trıýk, tipti daıyndalǵan atlet úshin de óte qaýipti.
«Qatelik jiberseń, sońy jaqsylyqpen aıaqtalmaýy múmkin. 25 dana! Men jattyǵýda 14-ke deıin barǵanmyn. Óte qıyn boldy. 25 shardy jarylǵansha úrlegenińizdi kóz aldyńyzǵa elestetip kórińizshi. Al munda shardyń ornynda jylytqy! Sizder ne dep oılaısyzdar? Men oǵan kelistim. Al endi jattyǵýdy bastaımyn», - deıdi rekordsmen.
Eske sala keteıik, bıylǵy mamyr aıynda Astanada Sergeı Tsyrýlnıkov salmaǵy 148 tonnalyq vagon tirkeýli teplovozdy birneshe metrge súırep, rekord ornatqan bolatyn.
Sergeı týlaǵan attardy ustap turý, jylytqylardy úrlep jarý sııaqty kóptegen rekordtardyń ıesi. 2018 jylǵy maýsym aıynda ol kókke kóterilip jatqan árqaısysy 800 kelilik eki ushaqty ustap turǵan bolatyn. Ol joly qazaqstandyq rekordtar kitabynyń ókilderin shaqyrmaǵan, onyń erligin joldastary kameraǵa túsirip alǵan edi.
