Qazaqstandyq kelinshekti Sırııa eki ulynan aıyrdy
– Sham eline ne úshin bardyńyz?
– Men Sırııaǵa úlken ulymdy izdep bardym. Men ony elge qaıtarý úshin otbasymen bardym. Barlyǵymyz bes adam boldyq. Aqyr sońynda bir ulymnan aıyryldym. Al ekinshisi bolsa tutqynǵa tústi. Qazir ol Irakta.
– Ol jaqta neniń kýási boldyńyz?
– Ol jaqta DAISh-ti qoldamaǵandy kelip úıden zorlyqpen alyp ketip, óltiretin. Balalarǵa arnalǵan «Mýaskarlar» lagerler boldy, ol jerde gomoseksýalızm boldy. Balalarǵa ólim jazasyn kórsetý arqyly zulymdyqqa úıretti. Nátıjesinde olar janýarlarǵa qatygezdik kórsetip, janýarlardy baýyzdap, olardy «kápirler» men «shaıtandar» dep atady. Olardyń psıhıkasy osy baǵytta qalyptasty. Olarǵa árdaıym qandy shaıqasty kórsetip otyrdy. Tipti balalardyń bir birine oq atqan kezderi de boldy.
–DAISh-tyń sodyrlarynan qashqysy kelgender kóp boldy ma?
– Iá, kóbisi qashýǵa daıyn boldy. Biraq olar qoryqqannan úndemeı aıtqandaryna kónip júrdi. Eshkim óz oıyn ashyq aıta almaıtyn. Sebebi, olardy sol úshin jazalaýy múmkin edi. Ketkisi kelgenderdi DAISh sodyrlary «mýrad» dep sanaıtyn.
– Sizdiń ulyńyz DAISh qataryna qalaı qosyldy?
– Meniń balamdy 14 jasynda alyp ketti. Ol arnaıy áskerı daıyndyqtan ótken joq. ıAǵnı, tájirbıesiz boldy. Ol oqýǵa nıet bildirgen. Biraq oǵan ámir buıryq berip, «kimniń oqıtynyn, kimniń oqymaıtynyn munda men sheshem» dep, ony jaýyngerlerdiń aldyńǵy qataryna jiberdi. Shaıqas bastalǵanda meniń balam jaraqat alyp, ıraktyqtardyń qolyna tutqynǵa tústi. Sodyrlar ony soǵys alańyna tastap ketken.
–DAISh balańyzdy qutqarýǵa áreket jasady ma?
– Olar menen 5000 AQSh dollaryn alyp, aqshany Iraktaǵy qorǵaýshyǵa jiberemiz degen. Aqyry aqshany qaıtarǵan joq. Balam týraly eshqandaı habar bermedi.
– Sırııaǵa barýdy kózdegen baýyrlarymyz ben qandastarymyzǵa ne aıtar edińiz?
– Meniń aıtatynym - ol jerdegi jaǵdaı ıslam emes, sharıǵat emes jáne ol jaqta eshqandaı halıfat joq.
– Áńgimeńizge rahmet!
