Qazaqstandyq «Kelin» fılmi Oskardyń úzdik bestiginiń qataryna ilige almady
ALMATY. Aqpannyń 3-i. QazAqparat /Ernar Beken/ - Osyǵan deıin habarlanǵandaı, «Oskar» júldesinen úmitker qazaqstandyq «Kelin» fılmi kınoakademııa músheleriniń sheshimimen jartylaı fınalǵa ótken bolatyn.
Keshe Los-Anjeleste amerıkandyq kınoakademııasynyń prezıdenti Tom Shırak pen aktrısa Enn Heteýeı «Oskar-2009» syıyna úmitker nomınanttardyń tizimin jarııa etti, dep habarlaıdy QazAqparat.
Ermek Tursynovtyń «Kelin» fılmi ózge elderdiń segiz fılmimen qatar «Úzdik sheteldik fılm» atalymy boıynsha jartylaı fınalǵa ótken bolatyn. Alaıda, keshe belgili bolǵandaı, qazaqstandyq kınotýyndy «Oskar» júldesi úshin talasatyn úzdik bestiktiń qataryna ilige almady.
Bul atalymda Avstrııanyń rejısseri Mıhael Hanekeniń «Aq lenta» jumysy júldege basty úmitker retinde qazirdiń ózinde jurtshylyq nazaryn aýdaryp otyr. Atalǵan kartına osyǵan deıin kóptegen bedeldi júldeler alyp úlgerdi.
Oskar jeńimpazdary naýryzdyń 7-si kúni ótetin saltanatty tabystaý rásiminde belgili bolady.
