Qazaqstandyq «Kelin» fılmi Oskar júldesiniń jartylaı fınalyna shyqty
ALMATY. Qańtardyń 21-i. QazAqparat /Ernar Beken/ - «Oskar» júldesinen úmitker «Kelin» fılmi kınoakademııa músheleriniń sheshimimen jartylaı fınalǵa ótti. «Úzdik sheteldik fılm» atalymy boıynsha taǵy segiz kınokartına iriktelinip alyndy,
dep habarlaıdy QazAqparat Associated Press aqparat agenttigine silteme jasap.
Osyǵan deıin de habarlanǵandaı, osy nomınatsııaǵa álemniń 65 elinen kıno týyndylar kelip túsken bolatyn. Solardyń qatarynda Ermek Tursynovtyń qoǵamda úlken pikirtalas týdyrǵan «Kelin» fılmi men Reseıdiń Karen Shahnazarov túsirgen «Palata №6» fılmi de bar edi.
Sonyman jartylaı fınalǵa toǵyz kınotýyndy «Úzdik sheteldik fılm» atalymy boıynsha ótip otyr: Qazaqstannan «Kelin», Argentınadan «El Secreto de Sus Ojos», Avstralııadan «Samson & Delilah», Bolgarııadan «The World is Big and Salvation Lurks Around the Corner», Frantsııadan «Un Prophete», Perýden «La teta asustada», Izraılden «Ajami», Nıderlandydan «Oorlogswinter» jáne Avstrııadan «Aq lenta».
Oskardyń aqtyq kezeńine osy toǵyz fılmniń tek beseýi ǵana ótedi. Nomınanttardyń tizimi ústimizdegi jyldyń 2 aqpanynda jarııa etilmek. Al jeńimpazdar 7 naýryz kúni júldeni saltanatty tabystaý rásiminde belgili bolady.
