Qazaqstandyq kedenshiler ózderiniń kásibı merekesin atap ótýde
ASTANA. Jeltoqsannyń 12-si. QazAqparat /Gúlmıra Álıakparova/ - Búgin, jeltoqsannyń 12-si - qazaqstandyq kedenshilerdiń kásibı merekesi.
Osy kúni 1991 jyly QR Prezıdentiniń Jarlyǵyna sáıkes Qazaqstannyń keden qyzmeti quryldy, dep habarlaıdy QazAqparat.
Kedendik organnyń qurylýy respýblıkamyzdyń egemendigin alýymen tuspa-tus keldi. Sodan beri el táýelsizdigimen jasasyp, memlekettiń múddesin qorǵaý isinde, onyń ekonomıkalyq jáne ulttyq qaýipsizdigin qamtamasyz etýde abyroıly qyzmet atqaryp keledi. Buǵan deıin birneshe ret reformalanǵan kedendik organ bıyl 18 jyldyq mereıtoıyn atap ótýde.
Búgingi merekege oraı Qazaqstan kedenshilerin QR Qarjy mınıstrligi Kedendik baqylaý komıtetiniń tóraǵasy Qozy-Kórpesh Kárbozov quttyqtady.
«Kedendik qyzmet - memlekettiń syrtqy jáne ishki saıasatyn júzege asyrýdaǵy mańyzdy býyn. Qazaqstandyq kedenshiler, respýblıkanyń ekonomıkalyq múddelerin qorǵaýda ózderine artylǵan mindetterdi adamgershilikpen jáne abyroımen atqaryp otyrǵandaryn qanaǵattana atap ótkim keledi. Kedendik qyzmet memlekettik bıýdjettiń kiris bóligine qarajattardyń túsý kózderiniń biri bolyp tabylady, sondaı-aq - Qazaqstannyń turaqty ekonomıkalyq damýynyń jáne onyń turǵyndarynyń ál-aýqatynyń ósýiniń berik negizi. Sizderdiń aıanbaı atqaryp otyrǵan eńbekterińiz úshin, ymyrasyzdyq pen isterińizge degen adaldyqtaryńyz úshin alǵys bildirýge ruqsat etińizder. Sizge jáne jaqyndaryńyzǵa myqty densaýlyq, Otanymyzdyń gúldenýi jolyndaǵy qyzmetterińizge jańa tabystar tileımin!», delingen quttyqtaýda.
