«Qazaqstandyq qazyna 70 mıllıard teńgeden qaǵyla ma?» - respýblıkalyq basylymdarǵa sholý
ASTANA. Aqpannyń 23-i. / QazAqparat/ - Qazaq aqparat agenttigi respýblıkalyq basylymdarda aqpannyń 23-i, seısenbi kúni shyqqan ózekti materıaldarǵa sholýdy usynady.
Keshe Aqordada Prezıdent Nursultan Nazarbaev Reseı Federatsııasynyń Syrtqy ister mınıstri Sergeı Lavrovty qabyldady. Osy taqyrypty arqaý etken maqala «Egemen Qazaqstan» basylymynyń búgingi sanynda «Serpindi seriktestik» degen taqyryppen berilipti. «Eki el arasyndaǵy dostyq qarym-qatynas táýelsizdik jyldary ishinde jaqsy jalǵasyp kele jatqany belgili. Aıtalyq, álemdi sharlaǵan daǵdarysqa qaramaı, saýda salasyndaǵy ekijaqty baılanys ótken jyly 12,2 mıllıard dollardy qurapty. Mundaı ilgerileýshilik munaı-gaz, elektr energetıkasy, atom energııasy boıynsha da oń qadamdarǵa ıe bolypty. Al aımaqtar arasyndaǵy qarym-qatynasqa keler bolsaq, Reseıdiń 70 óńiri bizdiń Otanymyzdyń shekaralyq oblystarymen seriktestikte jumys jasaıdy. Olardyń ishinde Chelıabi, Orynbor, Omby, Sverdlov, Novosibir oblystary bar»,- deıdi basylym.
«Myń bolǵyr Mirjaqyp atamyzdyń: "Oıan, qazaq!" degenine de ǵasyr aınalyp barady. Biraq, soǵan selt etken qazaq keı jerlerde qadaý-qadaý, al kópshiligi áli uıqyly-oıaý. Sol samarqaýlyǵymyzdy paıdalanǵan keıbir pysyqaılar ulttyń muń-muqtajyn oılaǵansyp, jeke basynyń sharýasyn túgendep júr. Shyndyǵy kerek, qazir "Qazaǵym!" dep qaqyldaǵandardan qorqatyn boldyq. Ondaılar Jezqazǵan aımaǵynda da barshylyq. Keıingi bir-eki jyldyń ózinde "Tilim!" dep tebirenip, "Elim!" dep eńiregende jurtshylyqtyń júregin eljiretetin eki azamat ózderi basqaryp otyrǵan mekemelerdiń qarjy-qarajatyn talan-tarajǵa salyp, aqyry taıyp turdy»,- dep jazǵan «Egemen Qazaqstan» gazetiniń búgingi sanyndaǵy kelesi maqala qoǵamdaǵy taǵy bir keleńsizdiktiń shetin ashypty. Egjeı-tegjeıin «Sózben istiń qabyspaǵany qalaı?» degen taqyryppen berilgen maqaladan oqı alasyzdar.
***
«Kedendik odaq kúshine minisimen, qazaqstandyq qazyna 70 mıllıard teńgedeı kiristen aıyrylmaq. Keshe qos shatyrly Parlament qabyrǵasyndaǵy jıynda Májilistiń Qarjy jáne bıýdjet komıtetiniń tóraıymy Gúljan Qaraǵusova osy derekti jarııa etip, dabyl qaqty»,- dep jazdy «Aıqyn» basylymynyń búgingi sany. Tolyǵyraq «Qazaqstandyq qazyna 70 mıllıard teńgeden qaǵyla ma?» degen taqyryppen berilgen maqaladan oqı alasyzdar.
«Aıqyn» gazetiniń búgingi sanynda «Tarıhı eskertkishter kóne zamannan syr shertedi» dagen atpen, «Moınaq» arheologııalyq ekspedıtsııasynyń jetekshisi Juman Smaılovpen bolǵan suhbat jaryq kóripti. Suhbatta qazba jumystarynyń qyr-syry sóz bolady.
«Qazaqtyń yrymy energetıkalyq kúshke aınalyp ketken...» osy taqyryppen jaryq kórgen «Aıqyn» gazetindegi kelesi maqalada jazýshy-etnograf Zeınep Ahmetova salt-dástúrimiz ben ádet-ǵurypymyz jaıynda óz oılaryn ortaǵa salypty. «Qazaqtyń ǵasyrlar boıy qalyptasqan salt-dástúrleri men yrym-tyıymy ulttyq kodqa, energetıkalyq kúshke aınalyp ketkendigin ishteı moıyndasaq ta, jeme-jemge kelgende kejegemiz keıin tartyp, úrkip turatyn kezimiz kóp. Degenmen, búginde sábılerin besikke bóleıtin, tusaýkeserge mán beretin otbasylar kóbeıdi. Bul - kóńil qýantarlyq jaǵdaı. Óz tanym-nanymymyz ózimizge ǵana juǵysty bolatynyn túsine bastaǵandaımyz»,-deıdi basylym.
***
«96 myń jádiger 96 sharshy metr jertólede tunshyǵyp jatyr». «Alash aınasy» gazeti osyndaı taqyryppen Semeıdiń 127 jyldyq tarıhy bar Ólketaný murajaıyndaǵy jádigerlikterdiń kóbiniń jertólede jatqanyna alańdaıdy. «Eger aıaqasty tilsiz jaý bola qalsa, búkil tarıhymyzdy óz qolymyzben otqa tastaǵandaı bolamyz» dep murajaı basshylyǵy dabyl qaǵyp otyr. Bul týraly gazettiń 1-3 betterinen oqı alasyzdar.
«Doktrınada qazaq ultynyń mıssııasy anyq ta basa kórsetilýi tıis. Qazaqstan halqyn biriktirý mindeti de qazaq halqyna júktelýi tıis. Qazaqstan halqy Assambleıasyna ulttyq saıasatpen aınalysýdy júkteý de qaıta qaraýdy talap etedi. Sebebi ulttyq saıasatpen bir ǵana mekeme emes, tutas memleket, memlekettik uıymdar aınalysýy zańdylyq»,- deıdi saıası ǵylymdardyń doktory, professor Gúlshat Nurymbetova «Alash aınasy» gazetinine bergen suhbatynda. Sarapshynyń doktrınaǵa qatysty usynystary týraly bilgińiz kelse, gazettiń dástúrli «Dat!» aıdaryndaǵy «Top etip, birden joǵary qyzmetke otyrǵan adamnan halyqqa paıdaly, memleketke tıimdi sheshimder kútý asa qıyn» degen taqyryptaǵy suhbatqa nazar aýdaryńyz.
«Gepatıtpen aýyratyn dárigerler tis emdep júr». Osy taqyryppen berilgen «Alash aınasy» gazetindegi kelesi maqala eldi eleń etkizbeı qoımaıdy. «Pavlodar oblysy aýmaǵyndaǵy 100-den astam emhanaǵa júrgizilgen sanıtarlyq-epıdemıologııalyq tekserý nátıjesinde 22 qyzmetkerdiń S jáne V gepatıtterine shaldyqqany anyqtalǵan. Jalpy, sanıtarlyq-epıdemıologııalyq tekseriske qatysqan 101 tis emhanasynyń 64,3 paıyzy, ıaǵnı 65-inde dezınfektsııalyq-zalalsyzdandyrý tártibiniń buzylǵany ári emhana ishindegi ınfektsııalardyń aldyn alý sharalarynyń talapqa saı júrgizilmegeni anyqtalypty»,- deıdi basylym.
***
«Jeńis kúngi kóz jasy» osy taqyryppen berilgen «Astana aqshamy» gazetiniń búgingi sanyndaǵy maqalada Uly Otan soǵysynyń ardageri, baıyrǵy chekıst Kárı Ábıtov aqsaqaldyń óz aýzynan aıtylǵan áńgimesi baıandalypty. «Salt atty adam «súıinshilep» aıǵaılap kele jatty. Nemister Berlınde jeńilgeni týraly aktige qol qoıypty. Kópten kútken jańalyqty estigen soldattar pılotkalaryn aspanǵa atyp, qýanyshtan kóz jastaryn tókti. Ómirimde dál osyndaı qýanǵan adamzatty ekinshi qaıta kórmedim»,- deıdi qarııa óz sózinde.
«Kúldir-kúldir kisinetip, kúreńdi mingen, kúderiden baý taǵyp, kireýke kıgen ata qazaqtyń, or qoıandaı júgirtip, ash kúzendeı búgiltip, jalaýly naıza qolǵa ustap, ǵumyry at belinde ótken, basynan nebir kúnder keshken qaıran qazaqtyń, kúı atasy Ketbuǵany týdyrǵan qazaqtyń arǵy-bergi hám buryn-sońǵy tarıhynda tuńǵysh ret «Qazaqtyń 1000 kúıi» shyǵady»,- dep jazdy «Astana aqshamy» basylymynyń búgingi sany. Jaqsy habarǵa jarshy bolǵan maqala «Myń ólip, myń tirilgen» qazaqtyń myń kúıi jaryqqa shyǵady» degen taqyryppen berilipti.
«Dástúrli mýzykalyq murany jınaqtaý osy joly asa zor qarqynmen qolǵa alyndy. Qazaq radıosy «Altyn qorynyń», Qurmanǵazy atyndaǵy Ulttyq konservatorııasy dástúrli mýzyka kafedrasy, Qazaq Ulttyq Ǵylym akademııasy Muhtar Áýezov atyndaǵy ádebıet jáne óner ınstıtýty, Qazaqstan Respýblıkasy Memlekettik murajaıy fonotekalaryndaǵy dybys jazbalary paıdalanyldy»,- deıdi basylym.
